სამართალი

თუკი 3 იანვრისთვის არ მექნება მომზადებული დასკვნითი სიტყვა, შეიძლება, ისევ მოვითხოვო გონივრული ვადა - მიხეილ სააკაშვილის სახაზინო ადვოკატი

სანდრო გირგვლიანის საქმეზე საქართველოს ექს-პრეზიდენტის, მიხეილ სააკაშვილის სახაზინო ადვოკატის, სოფიო გოგლიჩიძის განცხადებით, სასამართლო განხილვის გადადებით ის არ ცდილობს პროცესის გაჭიანურებას.

მან განაცხადა, რომ საქმის მასალების ნაწილს გაეცნო, თუმცა გადატვირთული გრაფიკის გამო დასკვნითი სიტყვის მომზადება ვერ მოახერხა.

„მასალების გარკვეულ ნაწილს უკვე გაცნობილი ვარ და ვეცდები, მოცემულ ვადაში ჩავეტიო, მაგრამ თუკი 3 იანვრისთვის არ მექნება მომზადებული დასკვნითი სიტყვა, შეიძლება, ისევ მოვითხოვო გონივრული ვადა. არანაირად არ აქვს ადგილი ჩემი მხრიდან პროცესების გაჭიანურებას. დატვირთული გრაფიკის გამო რამდენიმე მოსამართლეს ვთხოვე სხვა საქმეებზე პროცესების გადადება. ასევე წარმოვადგინე ცნობები, რომ არამარტო გადავდე სასასამართლო პროცესები, არამედ გარკვეულ პროცესებში მივიღე მონაწილება, ასევე ვიმყოფებოდი ნომერ მერვე დაწესებულებაში ბრალდებულთან კონსულტაციაზე, ასევე მთავარ პროკურატურაშიც მომიწია მისვლა“, -თქვა გოგლიჩიძემ.

გოგლიჩიძის ინფორმაციით, ის ვერ დაუკავშირდა მიხეილ სააკაშვილს დროის სიმცირის გამო, ხოლო ყოფილი პრეზიდენტის ოჯახისთვის გაგზავნილ წერილზე პასუხი არ მიუღია.

თბილისის საქალაქო სასამართლომ 3 იანვრისთვის გადადო სანდრო გირგვლიანის საქმის განხილვა, რომელშიც ბრალდების მხარე საქართველოს ექს-პრეზიდენტ მიხეილ სააკაშვილს ედავება თანამდებობრივი უფლებამოსილების ბოროტად გამოყენებას.

პროცესის გადატანა მოხდა სააკაშვილის სახაზინო ადვოკატის, სოფიო გოგლიჩიძის შუამდგომლობით. მან განმარტა, რომ საქმის მასალების გაცნობა ვერ მოასწრო.

პროკურორი ირაკლი ნადარეიშვილი განხილვის გადატანით უკმაყოფილო აღმოჩნდა. მან გოგლიჩიძე სიცრუეში დაადანაშაულა და აღნიშნა, რომ თუ გოგლიჩიძე ისევ გამოვა ამ შუამდგომლობით და ვერ მოასწრებს მასალების მომზადებას, ის სახაზინო ადვოკატის დისციპლინური პასუხისმგებლობის საკითხს დააყენებს.

მიხეილ სააკაშვილს გირგვლიანის საქმეზე სახაზინო ადვოკატი 14 დეკემბერს დაუნიშნეს მას შემდეგ, რაც საქართველოს ექს-პრეზიდენტმა საქართველოს სასამართლოებში მიმდინარე საქმეებზე ადვოკატები აიცილა.

ანა მებურიშვილი