სამართალი

დაცვის მხარემ 12 დღის განმავლობაში მხოლოდ 3 საათი იმუშავა - პროკურორი მიხეილ სააკაშვილის სახაზინო ადვოკატის დისციპლინური პასუხისმგებლობის დაყენებას აპირებს

თბილისის საქალაქო სასამართლომ 3 იანვრისთვის გადადო სანდრო გირგვლიანის საქმის განხილვა, რომელშიც ბრალდების მხარე საქართველოს ექს-პრეზიდენტ მიხეილ სააკაშვილს ედავება თანამდებობრივი უფლებამოსილების ბოროტად გამოყენებას.

პროცესის გადატანა მოხდა სააკაშვილის სახაზინო ადვოკატის, სოფიო გოგლიჩიძის შუამდგომლობით. მან განმარტა, რომ საქმის მასალების გაცნობა ვერ მოასწრო.

პროკურორი ირაკლი ნადარეიშვილი განხილვის გადატანით უკმაყოფილო აღმოჩნდა. მან გოგლიჩიძე სიცრუეში დაადანაშაულა.

„როგორც წინა, ასევე დღევანდელ პროცესზე დავადასტურეთ, რომ ადვოკატმა იცრუა, რომ საქმის მასალების გაცნობა გადატვირთული გრაფიკის გამო ვერ შეძლო. ჩვენ გამოვითხოვეთ დოკუმენტები და დადასტურდა, რომ დაცვის მხარემ ამ 12 დღის მანძილზე, რა ვადაც მიეცა დასკვნითი სიტყვის მოსამზადებლად, იმუშავა სულ სამი საათი. სხვა საგამოძიებო მოქმედებაში ან სასამართლო პროცესში მას მონაწილეობა არ მიუღია. შესაბამისად, არგუმენტი, რომ ვერ ასწრებს ამ საქმის გაცნობას, სხვა საქმეებში მონაწილეობის გამო, არის სიცრუე“, - თქვა პროკურორმა ჟურნალისტებთან.

მან აღნიშნა, რომ თუ გოგლიჩიძე ისევ გამოვა ამ შუამდგომლობით და ვერ მოასწრებს მასალების მომზადებას, ის სახაზინო ადვოკატის დისციპლინური პასუხისმგებლობის საკითხს დააყენებს.

„თუ ადვოკატი 3 იანვარს ჩანიშნულ სხდომაზე ისევ სხვა არარეალურ მიზეზს მოიგონებს და ანალოგიურ შუამდგომლობას დააყენებს, მე პირადად მივმართავ საქართველოს ადვოკატთა ასოციაციის ეთიკის კომისიას, აღნიშნული ადვოკატის საკითხზე მსჯელობის მიზნით, რათა დაადგინონ დისციპლინური პასუხისმგებლობა", - თქვა ნადარეიშვილმა.

მიხეილ სააკაშვილს გირგვლიანის საქმეზე სახაზინო ადვოკატი 14 დეკემბერს დაუნიშნეს მას შემდეგ, რაც საქართველოს ექს-პრეზიდენტმა საქართველოს სასამართლოებში მიმდინარე საქმეებზე ადვოკატები აიცილა.

ანა მებურიშვილი