სამართალი

ტელეკომპანია ,,იბერიას“ საქმეზე მიხეილ სააკაშვილის ყოფილი მრჩეველი დაიკითხა

ტელეკომპანია ,,იბერიას“ სამაუწყებლო ლიცენზიის იძულებით ჩამორთმევის საქმეზე თბილისის საქალაქო სასამართლოში დაცვის მხარის მტკიცებულებების გამოკვლევა დაიწყო.

სხდომაზე მიხეილ სააკაშვილის ყოფილი მრჩეველი ეკონომიკურ საკითხებში, გიორგი ბედინეიშვილი დაიკითხა, რომელმაც სისხლის სამართლის საქმეზე ბრალდებულებთან ზურაბ ადეიშვილთან და გიორგი ლაცაბიძესთან საქმიანი ურთიერთობა დაადასტურა.

მოწმის თქმით, ტელეკომპანია ,,იბერიასთვის“ ლიცენზიის იძულებით ჩამორთმევას საკითხთან დაკავშირებით მოლაპარაკებებში მონაწილეობა არ მიუღია.

შესაბამისად, თავისი ჩვენებით მან უარყო ბრალდების მხარის მოწმის ბრიტანელი ბიზნესმენის დევიდ ჰისის ჩვენება. ამ უკანასკნელმა წინა პროცესზე გაიხსენა 2004 წლის ზაფხულში ლონდონის ერთ-ერთი სასტუმროს კაფე-ბარში პრეზიდენტ საააკშვილის მრჩეველ გიგა ბედინეიშვილთან შეხვედრა, რომელზეც მისი თქმით, მიიღო ინფორმაცია, რომ „ომეგა ჯგუფში“ შემავალ კომპანიებში მუშაობა განახლდებოდა მხოლოდ მთავრობის მიერ ნომინირებული პირისთვის კომპანიის 51% წილის უსასყიდლოდ დათმობის შემთხვევაში. ბიზნესმენის განცხადებით, ამ შეხვედრას ესწრებოდა მისი მეუღლეც, ჯილიანა ჰისიც. ეს უკანასკნელი ასევე დაიკითხა სასამართლო პროცესზე და მანაც დაადასტურა გიგა ბედინეიშვილთან შეხვედრის ფაქტი.

საქმეზე მომდევნო სხდომა 12 ივნისს დაცვის მხარის მტკიცებულებების გამოკვლევით განახლდება.

შეგახსენებთ, რომ პროკურატურამ ტელეკომპანია ,,იბერიას’’ დახურვისა და სამაუწყებლო ლიცენზიის ჩამორთმევის საქმე 2016 წლის თებერვალში გახსნა. აღნიშნულ ფაქტთან დაკავშირებით ყოფილი გენერალური პროკურორი ზურაბ ადეიშვილი და მისი პირველი მოადგილე გიორგი ლაცაბიძე სისხლის სამართლის პასუხისგებაში მიეცნენ.