მსოფლიო

სომხეთში დღევანდელ აქციებზე 66 ადამიანი დააკავეს

დღეს სომხეთში მიმდინარე აქციების დროს პოლიციამ 66 პირი დააკავა. ინფორმაციას ადგილობრივი EVN Report-ი ავრცელებს სამართალდამცავ სტრუქტურებზე დაყრდნობით.

ერევანში გრძელდება აქციები სერჟ სარგსიანის წინააღმდეგ. დღეს განახლდა მსვლელობები ბაგრამიანისა და მაშტოცის გამზირებიდან ქალაქის ცენტრში. აქციებს ხელმძღვანელობს საპარლამენტო ოპოზიციური ფრაქცია „ელკის“ ლიდერი ნიკოლ პაშინიანი. შეკრებილები აპროტესტებენ სარგსიანის სომხეთის პრემიერ-მინისტრად არჩევას.

საპროტესტო აქციები მიმდინარეობს სომხეთის სხვა დიდ ქალაქებში, გიუმრისა და ვანაძორში.

აქციები 13 აპრილს დაიწყო. გუშინ პაშინიანმა განაცხადა სომხეთში „ხავერდოვანი რევოლუციის“ დაწყების შესახებ.

გუშინ საპროტესტო აქციების ფონზე სომხეთის პარლამენტმა პრემიერ-მინისტრის თანამდებობაზე ქვეყნის ყოფილი პრეზიდენტის სერჟ სარგსიანის კანდიდატურას მხარი დაუჭირა. 77-მა პარლამენტარმა სარგსიანის სასარგებლოდ მისცა ხმა, ხოლო 17-მა - წინააღმდეგ.

სომხეთის კონსტიტუციაში 2015 წელს შეტანილი ცვლილებებით, სომხეთი საპრეზიდენტოდან საპარლამენტო მმართველობაზე გადავიდა და პრეზიდენტის ნაცვლად პრემიერ-მინისტრი გახდა ყველაზე დიდი ძალაუფლებით აღჭურვილი პირი. პარლამენტის მიერ სარგსიანის კანდიდატურის მხარდაჭერის შემთხვევაში, ქვეყნის ექს-პრეზიდენტი ხელისუფლებას 2022 წლამდე უხელმძღვანელებს.