პოლიტიკა

სხვა ქვეყნის სამთავრობო უწყებასთან დაკავშირებულ მედიასაშუალებას არ შეიძლება მიეცეს მსგავსი ლიცენზია - სალომე სამადაშვილი „გაზპრომმედიაზე“

„ერთიანი ნაციონალური მოძრაობის“ წევრმა სალომე სამადაშვილმა მიმართა კომუნიკაციების ეროვნული კომისიის თავმჯდომარეს იმის ასახსნელად, რამდენად კანონიერია НТВ-Плюс-ისთვის მიცემული ლიცენზია.

სამადაშვილის თქმით, „გაზპრომმედიის“ კუთვნილი НТВ-Плюс-ის შემოსვლა ქართულ მედიაბაზარზე არის საფრთხის შემცველი. დეპუტატმა აღნიშნა, რომ „გაზპრომმედია“ უშუალოდ კრემლთან თანამშრომლობს.

„არ შეიძლება მედიასაშუალებას, რომელიც დაკავშირებულია სხვა ქვეყნის სამთავრობო უწყებასთან, მიეცეს მსგავსი ლიცენზია. გაზპრომი ეს არის რუსეთის ხელისუფლების ინსტრუმენტი, მათ დაქვემდებარებაში მყოფი მედიასაშუალებები არის საინფორმაციო იარაღი რუსეთის ხელში და ჩემთვის საინტერესოა, რატომ მიიღო გადაწყვეტილება აღნიშნულმა უწყებამ, რომ მიეცა მათთვის ჩვენ ქვეყანაში შეუზღუდავად ოპერირების შესაძლებლობა“, - აღნიშნა სამადაშვილმა.

2 დღის წინ გახდა ცნობილი, რომ აშშ-ის ფინანსთა სამინისტროს სასანქციო სიაში შეყვანილი რუსეთის უმსხვილესი მედიაჰოლდინგი „გაზპრომ-მედია“ ქართულ სატელევიზიო ბაზარზე შემოდის. ჰოლდინგი იმაუწყებლებს საქართველოში NTV-PLUS-ის ბრენდის სახელით.

იმავე დღეს საქართველოს კომუნიკაციების ეროვნულმა კომისიამ ნტვ+-ს წერილობით მიმართა, რომ კომისიაში წარდგენილ დეკლარაციას საქართველოს მეწარმეთა და არასამეწარმეო იურიდიული პირების რეესტრიდან ამონაწერი დაურთოს, წინააღმდეგ შემთხვევაში რუსულ კომპანიას ავტორიზაცია შეუჩერდება.