პოლიტიკა

აშშ-ის სასანქციო სიაში შეყვანილი „გაზპრომ-მედია“ ქართულ მედიაბაზარზე შემოდის

რუსეთის უმსხვილესი მედიაჰოლდინგი „გაზპრომ-მედია“ ქართულ სატელევიზიო ბაზარზე შემოდის. ჰოლდინგი იმაუწყებლებს საქართველოში NTV-PLUS-ის ბრენდის სახელით.

საქართველოში НТВ-плюс-ის პარტნიორი იქნება კომპანია მედიაჯგუფი, რომელიც იქნება დაკავებული საქართველოში პროდუქციის მარკეტინგული და ტექნიკური მხარდაჭერით. კომპანიის 50-პროცენტიან წილებს დავით ნაკაშიძე და გულნარა ხეჩოშვილი ფლობენ.

„გაზპრომ-მედიის“ გენერალური დირექტორის, დიმიტრი ჩერნიშენკოს განცხადებით, რუსულ ჰოლდინგს უკვე აქვს „პოზიტიური თანამშრომლობის გამოცდილება ქართულ მედიაჯგუფთან“, რადგან კომპანია „გაზპრომ-მედიას“ ექსკლუზიური დისტრიბუტორია.

НТВ-плюс-ის გენერალურმა დირექტორმა, მიხეილ დიომინმა არ დამალა, რომ ჰოლდინგის პრიორიტეტებში შედის გეოგრაფიული ექსპანსია და საქართველოს ისინი მხოლოდ მორიგ მედიაბაზრად არ განიხილავენ.

„გეოგრაფიული ექსპანსია შედის ჩვენი სტრატეგიული პრიორიტეტების რიცხვში. საქართველო, რა თქმა უნდა, არის პერსპექტიული ბაზარი, მაგრამ საქართველოში მაუწყებლობის დაყწებას განვიხილავათ არა მხოლოდ , როგორც ბიზნესსაქმიანობას. ჩვენთვის უმეტესწილად ეს ასევე სოციალური მისიაა. პერსპექტივაში არ გამოვრიცხავთ დსთ-ის ქვეყნებში გასვლას, სადაც ტექნიკურად შესაძლებელია НТВ-плюс-ის სიხშირის მიღება“, -თქვა დიომინმა.

მედიაჯგუფის გენერალური დირექტორის, დავით ნაკაშიძის მტკიცებით, „დღეისთვის არსებობს მოთხოვნა რუსულ არხებსა და ლეგალურ რუსულენოვან კონტენტზე“.

„გაზპრომ-მედია“ თავდაპირველად ქართველ მომხმარებლებს არხების ორ პაკეტს შესთავაზებს. შედარებით მცირე პაკეტში რუსული და უცხოური წარმოების 50-მდე სატელევიზიო არხი შევა. კომპანია ქართულ ბაზარს ასევე წარუდგენს შედარებით ფართო სატელევიზიო პაკეტს, რომელიც 90-ზე მეტ არხს მოიცავს.

შეთავაზებულ პაკეტებში ასევე შედის უშუალოდ „გაზპრომ-მედიის“ მიერ შექმნილი 20-ზე მეტი პროდუქტი. კომპანიის მიერ შეთავაზებული სატელევიზიო არხებიდან: 12 - საინფორმაციო, 14 - შემეცნებითი, 22 - გასართობი, 27 - კინოსა და ხუთ-ხუთი საბავშვო, სპორტული და მუსიკალური არხი იქნება.

ცნობისთვის, „გაზპრომ-მედია“ კრემლთან დაახლოებული რუსული ტრანსნაციონალური ენერგეტიკული კორპორაცია გაზპრომის შვილობილი კომპანიაა, რომელიც აშშ-ის ფინანსთა სამინისტროს სასანქციო სიაშია შეყვანილი უკრაინაში მიმდინარე კონფლიქტის გამო.