პოლიტიკა

რამზან კადიროვის განცხადების მიზანია, გაგვაბანძოს მთელი თავისუფალი სამყაროს თვალში - ნიკა რურუა

„ეს კონკრეტული აქტი მიზნად ისახავს, გაგვაბანძოს მთელი თავისუფალი სამყაროს თვალში“, - ასე გამოეხმაურა „ნაციონალური მოძრაობის“ ერთ-ერთი ლიდერი ნიკა რურუა ჩეჩნეთის ლიდერ რამზან კადიროვის განცხადებას, სადაც ის საუბრობს საქართველოსთვის იოსებ სტალინის ნეშტის გადმოცემაზე.

რურუას შეფასებით, ეს განცხადება რუსული პროპაგანდის ნაწილია.

„რა აქვს მიზნად ამ განცხადებას. კადიროვი, ვიცით, რომ პუტინის მარიონეტია, თავიდან ბოლომდე არის პუტინის დასმული, გაძლიერებული, პუტინის მოურავია თავისივე სამშობლოში, ხაზს ვუსვამ, დაპყრობილ სამშობლოში. ამიტომ, ეს განცხადება ეკუთვნის პუტინს, რეალურად რუსეთს, და ესაა იმ ჰიბრიდული ომის ნაწილი, რომელსაც რუსეთი საქართველოს წინააღმდეგ აწარმოებს და ეს კონკრეტული აქტი მიზნად ისახავს, რომ მთელი მსოფლიოს წინაშე გამოგვაჩინოს ძალიან ჩამორჩენილ, განუვითარებელ, მორალური ორიენტირის არმქონე ერად. გაგვაბანძოს , მარტივად რომ ვთქვათ, მთელი თავისუფალი სამყაროს თვალში“, - განაცხადა რურუამ „დიანა ტრაპაიძის დღის ამბებში“.

ანა მებურიშვილი