პოლიტიკა

სამართლიანი იქნება თუ სტალინის ნეშტი საქართველოს გადაეცემა - რამზან კადიროვი

ჩეჩნეთის ლიდერი რამზან კადიროვი ვლადიმირ ლენინის დამარხვის ინიციატივით გამოდის, ასევე მიიჩნევს, რომ იოსებ სტალინის ნეშტი საქართველოს უნდა გადაეცეს.

ამის შესახებ კადიროვმა Интерфакс-ს განუცხადა.

„არაერთხელ მითქვამს, რომ საჭიროა ლენინის დამარხვა, თუმცა პირადად ჩემთვის არ აქვს მნიშვნელობა მავზოლეუმში თუ სხვაგან იქნება ის. მეკითხებიან, საკუთარ აზრს გამოვთქვამ“,- განმარტა კადიროვმა.

რაც შეეხება სტალინის ნეშტს, კადიროვი ფიქრობს, რომ კეთილი ნება უნდა იქნას გამოვლენილი და ის საქართველოს გადაეცეს.

„კეთილი ნება უნდა იყოს გამოვლენილი და სტალინის ნეშტი საქართველოს უნდა გადაეცეს, რომ ის სამშობლოში დამარხონ. საქართველო საბჭოთა კავშირის ნაწილი იყო, რომელსაც იოსებ სტალინი მართავდა. ამიტომ, ლოგიკური და სამართლიანია, თუ საქართველოს მისი დამარხვის შესაძლებლობა მიეცემა, რუსეთის მილიონიბით ადამიანი კი შვებით ამოისუნთქავს იმის გამო, რომ სტალინის სული რუსეთს დატოვებს“,-განმარტა კადიროვმა.

მონიკა დავლიანიძე