პოლიტიკა

„ქართული ოცნება“ მედიას „აჯაფსანდალს“ სთავაზობს - ალეკო ელისაშვილი საერთო დებატების ფორმატზე

თბილისის მერობის დამოუკიდებელმა კანდიდატმა ალეკო ელისაშვილმა „ქართული ოცნების“ მიერ შეთავაზებულ საერთო დებატების ფორმატს „აჯაფსანდალი“ უწოდა. ელისაშვილის შეფასებით, მმართველი პარტია ასე ცდილობს გაამართლოს კალაძის უარი მის შეთავაზებაზე.

„ცდილობენ, ჩემს შეთავაზებაზე უარი „გააპრავონ“. „ქართული ოცნების“ შტაბი მედიას სთავაზობს გაურკვეველ ფორმატს, აჯაფსანდალს. ამაზეც თანახმა ვარ. არც ეს აჯაფსანდალია ჩემთვის დიდი პრობლემა. მინდა მივმართო ტელევიზიებს, რომ „ქართული ოცნების“ შტაბის დირექტივებით ნუ გადაწყვეტთ, როგორი ფორმატი უნდა იყოს. თქვენ თვითონ განსაზღვრეთ, როგორი უნდა იყოს დებატები“, - განაცხადა ელისაშვილმა.

ელისაშვილმა ტელევიზიებს მიმართა, თვითონ შეარჩიონ დებატების ფორმატი.

„გამოვიდა „ქართული ოცნების“ შტაბი და ამბობს, ტელევიზიები უნდა შეგროვდეს, ამდენი წამყვანი უნდა იყოს და ა.შ. ასე აკეთებს ალბათ კიმ ჩენ ინი ფხენიანში, ჩვენ კი ვცხოვრობთ თბილისში. მე მზად ვარ ნებისმიერ სახელისუფლებო ტელევიზიაშიც მივიდე, მთავარია, ტელევიზიებმა თავად გადაწყვიტონ, როგორი ფორმატი უნდა შესთავაზონ მაყურებელს”, - განაცხადა ელისაშვილმა.

აღნიშნული ინიციატივა საპარლამენტო უმრავლესობის ლიდერმა არჩილ თალაკვაძემ კახა კალაძის საარჩევნო შტაბში გამართულ ბრიფინგზე წამოაყენა. დებატებში მონაწილეობაზე თანახმაა „პატრიოტთა ალიანსის“ თბილისის მერობის კანდიდატი ირმა ინაშვილი.

თვითონ ელისაშვილმა მიმდინარე კვირას კახა კალაძე ორჯერ მიიწვია სატელევიზიო დებატებში, თუმცა უარი მიიღო.

ანა მებურიშვილი