პოლიტიკა

ალეკო ელისაშვილი ნამდვილად არ არის ჩემი მთავარი კონკურენტი - კახა კალაძე

„ქართული ოცნების“ თბილისის მერობის კანდიდატმა კახა კალაძემ უარი თქვა თავისი ოპონენტის, ალეკო ელისაშვილის მორიგ შეთავაზებაზე, ერთმანეთს სატელევიზიო დებატებში შეხვედროდნენ. კალაძის განმარტებით, ის თბილისის მერობის დამოუკიდებელ კანდიდატს თავის მთავარ კონკურენტად არ მიიჩნევს.

„ჩვენ დებატებში ვმონაწილეობთ, ამის პრობლემა „ქართულ ოცნებას“ არ გააჩნია, ამის პრობლემა კახა კალაძეს არ გააჩნია. ალეკო ელისაშვილი ნამდვილად არ არის ჩემი მთავარი კონკურენტი - ჩემი მთავარი კონკურენტია ის პრობლემები, ის ტკივილი და წუხილი, რომელიც დღეს ქალაქს აწუხებს. მე მოვდივარ იმისთვის, რომ ვმართო ქალაქი და როგორც ნორმალურ, ცივილიზებულ ქვეყნებში ხდება - დებატები იქნება თუ სხვა მიმართულება, ჩვენ ყოველთვის მზად ვართ მივიღოთ მონაწილეობა“, - თქვა კალაძემ.

ფეისბუკის საკუთარ გვერდზე გამოქვეყნებულ ვიდეოში ელისაშვილმა კიდევ ერთხელ მიიწვია კალაძე სატელევიზიო დებატებში, იმ პირობით, რომ შემდგომ მას ფეხბურთშიც შეეჯიბრება.

ალეკო ელისაშვილმა ანალოგიური მოთხოვნით კახა კალაძეს ორშაბათსაც მიმართა, თუმცა „ქართული ოცნების“ კანდიდატმა მას უარით უპასუხა.

ანა მებურიშვილი