სამართალი

პროკურორი ,,იბერია’’ ტვ-ს წამყვანის მიმართ შესაძლო ძალადობაზე: ყველანაირ ძალადობაზე უნდა მოხდეს სამართლებრივი რეაგირება

მთავარი პროკურატორის წარმომადგენელმა, ირაკლი ნადარეიშვილმა კომენტარი გააკეთა სამართალდამცველის მხრიდან ტელეკომპანია ,,იბერიის’’ ჟურნალისტის, გიორგი გასვიანის მიმართ შესაძლო ძალადობის ფაქტთან დაკავშირებით.

,,რა თქმა უნდა, ყველანაირ ძალადობაზე უნდა მოხდეს სამართლებრივი რეაგირება, უნდა დაიწყოს გამოძიება. რაც შეეხება უშუალოდ თქვენ მიერ მოყვანილ ფაქტს, ამის ირგვლივ მე ინფორმირებული არ ვარ. შესაბამისად, კონკრეტულად დეტალებზე ვერაფერს მოგახსენებთ. რაც შეეხება კითხვას, რა თქმა უნდა, უნდა დაიწყოს გამოძიება’’, - განუცხადა ჟურნალისტებს ირაკლი ნადარეიშვილმა.

ცნობისათვის: ტელეკომპანია ,,იბერიის’’ წამყვანი გიორგი გასვიანი სამართალდამცველებს ფიზიკურ და სიტყვიერ შეურაცხყოფაში ადანაშაულებს.

ტელეწამყვანის ინფორმაციით, შემთხვევა ბორჯომში სასტუმრო ,,კროუნ პლაზას’’ მიმდებარე ტერიტორიაზე გვიან ღამით მოხდა. მას პოლიცილებმა იარაღი დაადეს და ფიზიკურად გაუსწორდნენ. ჟურნალისტი ყვება, რომ მას ცემის პარალელურად პოლიციელები აგინებდნენ. როდესაც გაირკვა, რომ გასვიანი ჟურნალისტი იყო, პოლიციელები მას დაემუქრნენ, რომ თუ ის ამ ამბავს გაახმაურებდა, ,,უარესი მოუვიდოდა.’’

მომხდარის შემდეგ გიორგი გასვიანს ბორჯომის პოლიციაში რამდენიმე საათის განმავლობაში კითხავდნენ.

თოქშოუ ,,პრიორიტეტის’’ წამყვანი გვიან ღამეს ბორჯომში გაეროს ადამიანის უფლებათა დაცვის სემინარზე მიდიოდა.

როგორც შინაგან საქმეთა სამინისტროში აცხადებენ, ფაქტთან დაკავშირებით გენერალურმა ინსპექციამ მოკვლევა დაიწყო. უწყების ინფორმაციით, მომხდართან დაკავშირებით გამოძიება სისხლის სამართლის კოდექსის 126-ე მუხლით დაიწყო, რაც ძალადობას გულისხმობს.

ნინო ექვთიმიშვილი