სამართალი

ომბუდსმენი ე.წ კორტების საქმესთან დაკავშირებით გამოძიებას იმ მასალებს მიაწვდის, რომელიც მას აქვს

საქართველოს სახალხო დამცველის უჩა ნანუაშვილის განცხადებით, ომბუდსმენის ოფისში მივიდა ე.წ. კორტების საქმის მთავარი მოწმე, რომელმაც თქვა, რომ სასამართლოს ცრუ ჩვენება მისცა.

სახალხო დამცველის თქმით, ის მიმართავს პროკურატურას და წარუდგენს იმ მასალებს, რაც მას საქმესთან დაკავშირებით აქვს.

,,ვადასტურებ, რომ სახალხო დამცველის წარმომადგენელს შეხვდა ე.წ. კორტების საქმის მთავარი მოწმე, რომელმაც გამოხატა წუხილი, რომ არასწორი ინფორმაცია მიაწოდა გამოძიებას და მასზე ზეწოლა განახორციელეს. ჩვენ იმ ინფორმაციას, რაც გვაქვს დღეს წარვუდგენთ გამოძიებას და დეტალების შესახებ ინფორმაციასაც გავავრცელებთ", - განაცხადა უჩა ნანუაშვილმა.

შეგახსენებთ, რომ კორტების საქმეზე მსჯავრდებულის ირაკლი ფირცხალავას მეუღლე ნინო ხვიტია პროკურატურაში იყო დაბარებული მოწმეზე ზემოქმედების საქმესთან დაკავშირებით, თუმცა მან საგამოძიებო უწყებაში მისვლაზე უარი განაცხადა.

საქმე მას შემდეგ აღიძრა, რაც ვაზაგაშვილების ადვოკატმა გაგი მოსიაშვილმა გაასაჯაროვა ინფორმაცია, იმის შესახებ რომ პროკურატურის მთავარ მოწმეზე ფირცხალავას ოჯახის წევრები ჩვენების შეცვლის მოთხოვნით ზეწოლას ახორციელებდნენ.

ნინო ექვთიმიშვილი