პოლიტიკა

მესამე ვიცე-პრემიერის თანამდებობა ხარჯებს არ ზრდის - ალექსანდრე ჯეჯელავა

საქართველოს მესამე ვიცე-პრემიერის, განათლებისა და მეცნიერების მინისტრის ალექსანდრე ჯეჯელავას განცხადებით, მესამე ვიცე-პრემიერის თანამდებობა, ბიუროკრატიულ ხარჯებს არ გაზრდის.

ამის შესახებ ჯეჯელავამ „ქრონიკაში“ განაცხადა.

ამასთან, ჟურნალისტის მიერ დასმული კითხვის საპასუხოდ, თუ რატომ გახდა საჭირო მთავრობაში საზოგადოებასთან ურთიერთობის მიმართულების გაძლიერება, ხომ არ ნიშნავს ეს აღიარებას, რომ ამ სფეროში არის პრობლემები, ჯეჯელავა პასუხობს, რომ ის დაკვეთაა რომელიც საზოგადოებიდან მოდიოდა.

„რაიმეს გაძლირება პრობლემების აღიარებას არ ნიშნავს, ნიშნავს მნიშვნელობის აღიარებას. სხვადასხვა დროს ჩვენს ქვეყანას ჰყავდა ხელისუფლება, რომელიც ხანდახან საქმეს საერთოდ არ აკეთებდა, მაგრამ თავის არ გაკეთებული საქმეების წარდგენა შეეძლო ძალიან კარგად. ჩვენს შემთხვევაში საქმე კეთდება უამრავი, ძალიან კარგად კეთდება ბევრი მიმართულებით და ცოტა ნაკლები ყურადღება ექცეოდა მარკეტინგს, ანუ წარდგენას ამ საქმეების საზოგადოებისთვის და უკუკავშირის მიღებას. შესაბამისად, საჭიროება ამ ცვლილების, კოორდინაციის გაძლიერების არის საზოგადოებრივი დაკვეთა, ისევე როგორც ყველაფერი რასაც ჩვენი ხელისუფლება აკეთებს“,-აღნიშნა მესამე ვიცე-პრემიერმა.

რაც შეეხება ოპოზიციის მიერ გამოთქმულ ვარაუდს, რომ მესამე ვიცე-პრემიერის თანამდებობის დაწესება ბიუროკრატიულ ხარჯებს ზრდის, ალექსანდრე ჯეჯელავამ განაცხადა, რომ სასაცილოა ასეთი ტიპის განცხადების მოსმენა იმ პარტიის მხრიდან, რომლის წევრების პირადი ფუფუნება შედიოდა მაშნდელ ბიუროკრატიულ ხარჯში.

„ჩვენ სწორედ ის ხელისუფლება ვართ, რომელმაც უკანასკნელი თვეების განმავლობაში მნიშვნელოვნად შეამცირა ადმინისტრაციული ხარჯები. და სწორედ ეს ოპოზიცია, ამაზე წუხილს გამოთქვამდა - როგორ შეამცირეს და არასწორად გააკეთესო. ამიტომ, ამ კონკრეტულ ხალხს უნდა შევეგუოთ, რომ მათი მოსაწონი არაფერი იქნება“,-განაცხადა ჯეჯელავამა.

მისი თქმით, მესამე ვიცე-პრემიერის თანამდებობა „ხარჯებს არ ზრდის, მაგრამ ჩვენი მოქალაქეებისთვის, მთავრობის ანგარიშვალდებულებასა და გამჭირვალეობას გაზრდის“.

დღეს, მთავრობის სხდომაზე პრემიერ-მინისტრმა განაცხადა, რომ ალექსანდრე ჯეჯელავა მისი მესამე მოადგილე გახდა.

მონიკა დავლიანიძე