სამართალი

მაქსიმალურად შევეცდები, მიხეილ სააკაშვილს დავუკავშირდე - ექს-პრეზიდენტის ახალი ადვოკატი

საქართველოს ყოფილი პრეზიდენტის, მიხეილ სააკაშვილის ახლად დანიშნული სახაზინო ადვოკატის, სოფიო გოგლიჩიძის განცხადებით, ის სააკაშვილთან დაკავშირებას შეეცდება.

„შევეცდები მაქსიმალურად, რომ მოხდეს კომუნიკაცია მიხეილ სააკაშვილთან. დავუკავშირდები ოჯახის წევრებს. ვისთანაც მექნება შესაძლებლობა, მაქსიმუმს გავაკეთებ“, - თქვა ადვოკატმა სანდრო გირგვლიანის საქმეზე გამართული დღევანდელი პროცესის დასრულების შემდეგ.

გოგლიჩიძის შეფასებით, 1 კვირა არაა საკმარისი საქმის გასაცნობად და დასკვნითი სიტყვის მოსამზადებლად.

„საქმესთან ჯერ შეხება არ მაქვს. რამდენად შესაძლებელია, რომ ერთკვირიან ვადაში ჩავეტიო, რათა სრულყოფილად განვახორციელო დაცვა, არ ვიცი. თუ ვერ ჩავეტევი ამ ვადაში, ისევ მოვითხოვ სხდომის გადადებას“, -უთხრა ადვოკატმა ჟურნალისტებს.

მიხეილ სააკაშვილს სახაზინო ადვოკატი დაენიშნა. მის ინტერესებს სოფიო გოგლიჩიძე დაიცავს გირგვლიანის საქმეზე.

ქვეყნის ყოფილმა პრეზიდენტმა ქართულ მართლმსაჯულებას უნდობლობა გამოუცხადა და საქართველოს სასამართლოებში მიმდინარე საქმეებზე ადვოკატები აიცილა.

ანა მებურიშვილი