სამართალი

ირაკლი შოთაძე - გივი თარგამაძის ავტომობილის აფეთქების საქმეზე: მიმდინარეობს ღონისძიებები, რათა დადგინდეს დანაშაულის ჩამდენი მოქმედებდა თუ არა მარტო

მთავარი პროკურორის, ირაკლი შოთაძის განცხადებით, „ნაციონალური მოძრაობის“ წევრ, გივი თარგამაძის მანქანის აფეთქების საქმეზე ტარდება ყველა საგამოძიებო ოპერატიული და სამძებრო ღონისძიებები, იმის დასადგენად, თუ რა მოტივს ეფუძნებოდა დანაშაული და მოქმედებდა თუ არა მარტო დანაშაულის ჩამდენი.

როგორც შოთაძემ ჟურნალისტებს განუცხადა, ერთი პიროვნება უკვე მიცემულია სისხლის სამართლის პასუხისგებაში, რომელიც მიმალვაში იმყოფება და მის მიმართ ძებნაა გამოცხადებული.

,,მიმდინარეობს ყველა საჭირო საგამოძიებო და ოპერატიულ-სამძებრო ღონისძიება, რათა დადგინდეს აღნიშნული პირი მოქმედებდა თუ არა მარტო, რა მოტივი ამოძრავებდა მას და საქმისთვის სხვა მნიშვნელოვან დეტალებზე. გვესმის, მაღალია საზოგადოების ინტერესი ამ საქმისადმი და გამოძიების სიახლეებზე აუცილებლად მივაწვდით ყველას ინფორმაციას“, - განაცხადა ირაკლი შოთაძემ.

გივი თარგამაძის ავტომობილის აფეთქების საქმეზე შინაგან საქმეთა სამინისტრომ ერთი პირი დააკავა, ერთი კი პასუხისგებაში დაუსწრებლად მიეცა.

ნინო ექვთიმიშვილი