პოლიტიკა

გედევან ფოფხაძეს ჭორაობასა და ცილისწამებას ურჩევნია, საქმე აკეთოს, რაშიც ის ხელფასს იღებს - სოფიო კილაძე

ადამიანის უფლებათა დაცვის საპარლამენტო კომიტეტის თავმჯდომარემ, სოფიო კილაძემ დეპუტატი გედევან ფოფხაძე „ცილისმწამებელი კაცი უწოდა“ იმის გამო, რომ პარლამენტარმა ფაქსიმილეს უკანონო გამოყენებაში დაადანაშაულა.

„გედევან ფოფხაძე არის ცილისმწამებელი კაცი, ჭორაობასა და ცილისწამებას ურჩევნია, საქმე აკეთოს, რაშიც ის ხელფასს იღებს“, - თქვა კილაძემ.

კილაძის თქმით, ის ფაქსიმილეს ფიზიკურად ვერ გააყალბებდა.

„რაც შეეხება სავარაუდო დანაშაულს, მე ერთი რამ შემიძლია ვთქვა, როგორ შემეძლო გამეყალბებინა ფაქსიმილე, როცა ქვეყანაში ფიზიკურად არ ვიყავი. ვიყავი ჩინეთში და თუ ჩინეთიდან შეიძლება ფაქსიმილეს გაყალბება, მაშინ კი ბატონო, დანაშაული ჩამიდენია. გარდა ამისა, იურისტმა კაცმა უნდა იცოდეს, რომ თუ დანაშაულს ჰქონდა ადგილი და ის ამას ფარავდა, თავად უნდა მიეცეს პასუხისგებაში. მაშინ გედის პასუხისმგებლობაზეც ვიფიქროთ“,- განაცხადა კილაძემ.

ფოფხაძემ „იმედის კვირასთან“ სოფიო კილაძესთან მომხდარი კონფლიქტის დეტალებზე ისაუბრა.

„მოხდა რაღაც კონფლიქტი ჩვენ შორის, მივლინებაში ყოფნის დროს ჩემი ფაქსიმილე ჩემი ნებართვის გარეშე გამოიყენა, მე ვერ გავიგე, ეს რატომ გააკეთა და აღარ მაინტერესებდა ამ ადამიანთან ურთიერთობა. მოვიკითხე, ვთქვი, „ხალხო, ამას რატომ აკეთებს ეს ადამიანი?", ეს ხომ სისხლის სამართლის დანაშაულია“, - თქვა ფოფხაძემ .