პოლიტიკა

რატომ აკეთებს ამას კილაძე, ეს ხომ სისხლის სამართლის დანაშაულია - გედევან ფოფხაძე

დეპუტატმა გედევან ფოფხაძემ, რომელიც უმრავლესობას საზოგადოებრივი მაუწყებლის საბჭოს წევრად ნინია კაკაბაძის მხარდაჭერის გამო გაემიჯნა, ადამიანის უფლებათა დაცვის საპარლამენტო კომიტეტის თავმდჯომარესთან, სოფიო კილაძესთან მომხდარი კონფლიქტის დეტალებზე ისაუბრა.

„მოხდა რაღაც კონფლიქტი ჩვენ შორის, მივლინებაში ყოფნის დროს ჩემი ფაქსიმილე ჩემი ნებართვის გარეშე გამოიყენა, მე ვერ გავიგე, ეს რატომ გააკეთა და აღარ მაინტერესებდა ამ ადამიანთან ურთიერთობა. მოვიკითხე, ვთქვი, „ხალხო, ამას რატომ აკეთებს ეს ადამიანი?", ეს ხომ სისხლის სამართლის დანაშაულია“, - თქვა ფოფხაძემ „იმედის კვირასთან“.

დეპუტატმა აღნიშნა, რომ ეკა ბესელიასგან „მხარდაჭერას, თანადგომასა და ადამიანურ სოლიდარობას ყოველთვის განიცდის". მან დაასახელა თავის თანამოაზრეთა წრეც უმრავლესობიდან.

„მე მყავს ძალიან ბევრი ღირებულებითი თანამოაზრე. დათო ჭიჭინაძის მხრიდან აქტიურობას, ლევან კობერიძის გვერდში დგომას, ზაზა პაპუაშვილის განსაკუთრებულ პოზიციას, რუსლან პოღოსიანი ჩემი მეგობარია, ლევან გოგიჩაიშვილი, კობალაძე, გია კოპაძე, ირაკლი აბუსერიძე ჩვენთან მოიაზრებიან",- თქვა ფოფხაძემ.

ინფორმაცია უმრავლესობაში არსებული დაპირისპირების შესახებ მას შემდეგ გაჩნდა, რაც გედევან ფოფხაძემ საზოგადოებრივი მაუწყებლის სამეურვეო საბჭოში ნინია კაკაბაძის არჩევის გამო მმართველი გუნდის დატოვების გადაწყვეტილება მიიღო.