პოლიტიკა

განცხადების გავრცელებამდე კონსულტაციები გავიარეთ ვენეციის კომისიის ხელმძღვანელობასთან - ირაკლი კობახიძე

საქართველოს პარლამენტის თავმჯდომარემ ირაკლი კობახიძემ განაცხადა, რომ მმართველი გუნდის გადაწყვეტილება, არ მიეღო მონაწილეობა სტრასბურგის შეხვედრაში, ვენეციის კომისიასთან მოლაპარაკებების შედეგად იყო მიღებული.

კობახიძემ ოპოზიცია დაადანაშაულა, რომ მან შეიყვანა ჩიხში საკონსტიტუციო ცვლილებებზე კონსესუსის მიღწევის პროცესი.

„ჩვენ ვიდრე საკონსტიტუციო ცვლილებებთან დაკავშირებით განცხადებას გავავრცელებდით, მანამდე, ბუნებრივია, შედგა კონსულტაციები ვენეციის კომისიის ხელმძღვანელობასა და საპარლამენტო უმრავლესობის ლიდერებს შორის. სწორედ ასეთი კონსულტაციების შემდეგ გაკეთდა ჩვენი მხრიდან განცხადება.

რაც შეეხება პროცესებს, ჩვენ ოპოზიციის მხრიდან უმარტივეს კითხვაზე მოვითხოვეთ პასუხის გაცემა. პასუხის მიუღებულობის შემდეგ შეუძლებელი გახდა დისკუსიის წარმოება უმრავლესობასა და ოპოზიციას შორის. სამწუხაროდ, ოპოზიციამ ჩიხში შეიყვანა პროცესი. ამას ერთადერთი ახსნა აქვს, კონსენსუსის არმიღწევა როგორც ჩანს, იყო ოპოზიციის თვითმიზანი. ვენეციის კომისიამ დოკუმენტის ხარისხი შეაფასა მაღალ დონეზე და რადგან ოპოზიცია ხარისხზე ვერაფერს ამბობს, ისინი ყურადღებას ამახვილებენ კონსენსუსის არარსებობაზე. მათ ეგონათ, რომ ისინი მოგებულები დარჩებოდნენ, თუმცა ქართველი ხალხი დარჩა მოგებული, რომელმაც დახვეწილი კონსტიტუცია მიიღო“, - განაცხადა კობახიძემ.

გუშინ მმართველმა გუნდმა უარი თქვა სტრასბურგში დაგეგმილ შეხვედრაზე მონაწილეობის მიღებაზე. საპარლამენტო უმრავლესობამ შეხვედრის ჩაშლაში ოპოზიცია დაადანაშაულა. მმართველი გუნდის გადაწყვეტილებით, საკონსტიტუციო პროექტი საშემოდგომო სესიაზე, მესამე მოსმენით იქნება დამტკიცებული.

შეგახსენებთ, ვენეციის კომისიის თავმჯდომარემ ჯანი ბუკიკიომ ქართულ ოპოზიციურ პარტიებსა და მმართველ გუნდს 6 სექტემბერს, სტრასბურგში დაპატიჟა საკონსტიტუციო ცვლილებებზე სამსჯელოდ. ბუკიკიოს გუშინდელი განცხადებით, ეს შეხვედრა გაუქმებულია.

ანა მებურიშვილი