პოლიტიკა

ევროსაბჭოს მინისტრთა კომიტეტმა მიიღო გადაწყვეტილება, რომ დაჩქარებული წესით აღსრულდეს მერაბიშვილის საქმეზე მიღებული გადაწყვეტილება - ოთარ კახიძე

„ევროპული საქართველოს“ ერთ-ერთი ლიდერის, ოთარ კახიძის განცხადებით, ევროსაბჭოს მინისტრთა კომიტეტმა მიიღო გადაწყვეტილება, რომ დაჩქარებული წესით აღსრულდეს მერაბიშვილის საქმეზე ევროსასამართლოს მიერ მიღებული განაჩენი. ამის შესახებ დეპუტატმა პარლამენტის პლენარულ სხდომაზე სიტყვით გამოსვლისას თქვა.

კახიზემ მოუწოდა მმართველ გუნდს, შეასრულოს სტრასბურგის სასამართლოს მიერ მიღებული გადაწყვეტილება და ბერკეტები აამოქმედოს ვანო მერაბიშვილის გასათავისუფლებლად

„ევროსაბჭოს მინისტრთა კომიტეტმა მიიღო გადაწყვეტილება, რომ დაჩქარებული წესით აღსრულდეს მერაბიშვილის საქმეზე მიღებული გადაწყვეტილება. ეს გადაწყვეტილება მიიღება მხოლოდ იმ შემთხვევაში, თუკი სასწრაფოდ მისაღებია ინდივიდუალური ზომები ან საქმე გვაქვს მნიშვნელოვან სისტემურ პრობლემასთან. დიახ, ჩვენ საქმე გვაქვს მნიშვნელოვან სისტემურ პრობლემასთან, რომელიც უკავშირდება მართლმსაჯულების მექანიზმების გამოყენებას პოლიტიკური მიზნებით, მაგრამ როდესაც ეს პრობლემები გვაქვს, ჩვენ თვალს ვადევნებთ დაპირისპირებას პრეზიდენტსა და მმართველ გუნდს შორის, მოგიწოდებთ თქვენ და პრეზიდენტს - ვიწროპოლიტიკური პრიზმით ნუ შეხედავთ იმ პრობლემებს, რომელიც გვაქვს სასამართლო სისტემაში და გამოიყენეთ თქვენს ხელთ არსებული მექანიზმები - ეს არის იგივე პირობით ვადაზე ადრე გათავისუფლება და იგივე შეწყალების ინსტიტუტის ამოქმედება. ავარიდოთ ჩვენს ქვეყანას ის ზიანი, რომლიც ყოველდღიურად ადგება“, -განაცხადა კახიძემ.

2017 წლის 28 ნოემბერს სტრასბურგის სასამართლოს დიდმა პალატამ მიიღო გადაწყვეტილება, რომ ვანო მერაბიშვილის მიმართ ევროკონვენციის 2 მუხლი დაირღვა.