პოლიტიკა

„ევროპული საქართველოს“ ინიციატივები კონსტიტუციასთან დაკავშირებით სასაცილოა - გიორგი ახვლედიანი

პარტია „დემოკრატიული მოძრაობის“ საბჭოს წევრის გიორგი ახვლედიანის განცხადებით, სასაცილოა, როდესაც გიგა ბოკერიას ნაციონალური მოძრაობა, ანუ „ევროპული საქართველო“, კონსტიტუციაში ცვლილებების შეტანის მიზნით გარკვეული ინიციატივებით გამოდის.

ამის შესახებ ახვლედიანმა „ევროპული საქართველოს“ იმ ინიციატივის კომენტირებისას განაცხადა, რომლის მიხედვით, პრეზიდენტის არჩევის წესსა და საპარლამენტო არჩევნების სისტემასთან დაკავშირებით, პლებისციტი უნდა ჩატარდეს.

„მეცინება ხოლმე საერთოდ, როდესაც ნაციონალური მოძრაობა ამ მიმართულებით ინიციატივებს გვთავაზობს. „ევროპული საქართველო“ არის ბოკერიას ნაციონალური მოძრაობა, რომელიც ძალიან სასაცილო არის. მთელი ეს უბედურება რაც გვჭირს საარჩევნო სისტემასთან დაკავშირებით მათი მოგონილია, მათი დამკვიდრებულია და კბილებით იცავდნენ სანამ ხელისუფლებაში იყვნენ. ეხლა კიდევ მცდელობები იმისა, რომ გაითეთრონ თავი და გამოვიდნენ როგორც ამ სისტემის წინააღმდეგ მებრძოლები - ძალიან სასაცილოა“,-აღნიშნა პოლიტიკოსმა.

მონიკა დავლიანიძე