მსოფლიო

ერთად უფრო ძლიერები ვართ - ბარსელონაში სულ მცირე 350 000 ადამიანი ესპანეთის ერთიანობის მხარდასაჭერად გამოვიდა

კვირას სულ მცირე 350 000 ადამიანი გამოვიდა ბარსელონაში გამართულ ესპანეთის ერთიანობის მხარდასაჭერ მსვლელობაზე. შეკრებილებმა კატალონიის ესპანეთისგან გამოყოფა გააპროტესტეს.

ბიბისის ინფორაციით, მსვლელობის მონაწილეები აფრიალებდნენ ესპანეთისა და კატალონიის დროშებს, ხოლო საპროტესტო ბანერებზე ეწერა: „ერთად უფრო ძლიერები ვართ“ და „კატალონია ესპანეთია“.

1-ელი ოქტომბრის რეფერენდუმის შემდეგ ეს ყველაზე დიდი მსვლელობაა რეგიონის ესპანეთში დარჩენის მხარდასაჭერად.

შაბათს ანალოგიური მსვლელობები გაიმართა მთელი ესპანეთის მასშტაბით.

კატალონიაში რეფერენდუმზე ამომრჩეველთა 90%-მა მხარი დაუჭირა რეგიონის დამოუკიდებლობას. აქტივობამ 42.3% შეადგინა, ანუ 5,343,358 დარეგისტრირებული ამომრჩევლიდან საარჩევნო უბნებში 2,262,424 ადამიანი გამოცხადდა. ესპანეთის მთავრობამ ზომები მიიღო, რომ ხალხი არ მისულიყო ხმის მისაცემად.

კატალონიის პრეზიდენტმა კარლეს პუიჩდემონმა რეფერენდუმის შედეგებზე კომენტირებისას განაცხადა, რომ „კატალონიის მოქალაქეებმა მოიგეს უფლება გამოაცხადონ დამოუკიდებელი სახელმწიფო რესპუბლიკის სახით“. შედეგებს არ აღიარებს ოფიციალური მადრიდი. ესპანეთის საკონსტიტუციო სასამართლომ რეფერენდუმი უკანონოდ სცნო, ხოლო ქვეყნის პრემიერ-მინისტრმა მარიანო რეხოიმ პლებისციტი „დემოკრატიის დაცინვა“ უწოდა.

რეფერენდუმს არ აღიარებს ევროკომისიაც. მან მხარეებს დიალოგისკენ მოუწოდა.

ანა მებურიშვილი