პოლიტიკა

არც არაფერი მავიწყდება, მაგრამ ბოღმით და გესლით გულს ვერ დავიმძიმებ, როცა ვარ პოლიტიკოსი - გია ცაგარეიშვილი

,,თავისუფალი დემოკრატებიდან’’ წასული გია ცაგარეიშვილი აცხადებს, რომ ,,თავისუფალი დემოკრატების’’ ყოფილი წევრების გუშინდელი საგანგებო მიმართვა ,,ქართული ოცნების’’ ერთ-ერთ ლიდერთან, გია ვოლსკისთან შეთანხმებული არ ყოფილა.

როგორც ირაკლი ალასანიას ყოფილმა თანაგუნდელმა დღეს გამართულ პრესკონფერენციაზე განაცხადა, ,,ქართული ოცნების’’ წევრებთან აზრთა სხვადასხვაობა დღესაც კარგად ახსოვს, თუმცა საქმეს პირად ემოციებს ვერ გადააყოლებს.

,,თუ ჩვენ გვსურდა და გვინდოდა ფარული, მალული შეხვედრა ბატონ ვოლსკისთან, ,,იმედის’’ ტელეკამერის წინ არ შევბრძანდებოდით მის ოთახში და არ გამოვბრძანდებოდით იქიდან.

ხშირ შემთხვევაში ჩვენ გაგვიკრიტიკებია ერთმანეთი. ვყოფილვართ ხშირ შემთხვევაში სხვა პოზიციებზე. მიუხედავად ამისა, ცხოვრება გრძელდება. ხშირ შემთხვევაში ხუმრობენ, რომ პოლიტიკოსებს აქვთ რაღაც განსაკუთრებული თვისება, დაავიწყდეთ ურთიერთის მიმართ გაჟღერებული კრიტიკა, ზოგჯერ ზომაზე მეტად აგრესიულიც. მე არც არაფერი მავიწყდება, მაგრამ ბოღმით და გესლით გულს ვერ დავიმძიმებ, როცა ადამიანებთან ამგვარ ურთიერთობაში ვარ, როცა ვარ პოლიტიკოსი და უნდა ვიზრუნო და ვიფიქრო ქვეყნის წინსვლაზე და განვითარებაზე. პირად ემოციებს ეს ყველაფერი არ უნდა გადააყოლო’’, - განაცხადა გია ცაგარეიშვილმა.

ნინო ექვთიმიშვილი