პოლიტიკა

„თავისუფალი დემოკრატებიდან“ წასული ლიდერები ამომარჩეველს მოუწოდებენ ხმა „ქართული ოცნების“ კანდიდატებს მისცენ

პარტია „თავისუფალი დემოკრატების“ ყოფილი წევრები, დავით ონოფრიშვილი, ზურაბ აბაშიძე და გია ცაგარეიშვილი, თავის ამომრჩეველს მოუწოდებენ, რომ არჩევნების მეორე ტურში ხმა „ქართული ცონების“ კანდიდატების სასარგებლოდ მისცენ.

ამის შესახებ „თავისუფალი დემოკრატების“ ყოფილმა წევრებმა სპეციალურ ბრიფინგზე განაცხადეს.

„მალე არჩევნების მეორე ტური იქნება და რეალობა არის ისეთი,რომ პრაქტიკულად ყველგან არის დარჩენილი ორი პარტიის კანდიდატი, ესენი არიან „ქართული ოცნებისა“ და ნაციონალური მოძრაობის კანდიდატები. ამიტომ, მე, ჩემს მხარდამჭერებს, ჩემს თანამოაზრეებს, მოვუწოდებ, რადგან, აქ ალტერნატივა ნამდვილად არ არსებობს, რომ მხარი დაუჭიროთ „ქართული ოცნების“ კანდიდატებს“,-აღნიშნა დავით ონოფრიშვილმა.

ონოფრიშვილმა ასევე მოუწოდა თავის მომხრეებს მხარი დაუჭირონ „თავისუფალი დემოკრატების“ ჭიათურის მაჟორიტარობის კანდიდატს, თემურ გაფრინდაშვილს, რომელიც არჩევნების მეროე ტურში ღებულობს მონაწილეობას.

ამავე შინაარსის განცხადებები გააკეთეს ზურაბ ბაშიძემ და გია ცაგარეიშვილმაც.

მონიკა დავლიანიძე