პოლიტიკა

აფგან მუხთარლის გამოძიებაში გარკვეული შეფერხებებია, რადგან ქართულ მხარეს მისი დაკითხვის საშუალება არ ეძლევა - სოფიო კილაძე

ადამიანის უფლებათა დაცვის კომიტეტის საპარლამენტო კომიტეტის თავმჯდომარის, სოფიო კილაძის განცხადებით, თბილისიდან გაუჩინარებული და შემდგომში აზერბაიჯანში დაკავებული ჟურნალისტის, აფგან მუხთარლის საქმის გამოძიებას ის აფერხებს, რომ ქართულ მხარეს მისი დაკითხვის საშუალებას არ აძლევენ.

„როგორც შესაბამისი სამსახურების წარმომადგენლები ამბობენ, არის გარკვეული შეფერხებები იმიტომ, რომ დაკითხვის საშუალება არ ეძლევათ ჩვენს წარმომადგენლებს და კონკრეტულად ეს აჭიანურებს ამ საქმეს. ჩვენი მხრიდან რა ნაბიჯებიც იყო გადასადგმელი საგამოძიებო კუთხით, გადადგმულია. ვიხილეთ შსს-ის შუალედური დასკვნა და ვაგრძელებთ პროცესზე დაკვირვებას, მაგრამ ამ ეტაპზე ის არის მოცემულობა, რაც არის“, -უთხრა კილაძემ ჟურნალისტებს.

რაც შეეხება აფგან მუხთარლის ბრალდებებს, კილაძემ ისინი მიუღებელი უწოდა.

„ეს ბრალდებები არის აბსოლუტურად მიუღებელი პირადად ჩემთვის. ამას პოლიტიკური ელფერი დაჰკრავს და ალბათ, პოლიტიკური სარჩულიც აქვს. აბსოლუტურად გაუგებარი და დაუსაბუთებელი ბრალდებებია, ამიტომ ამაზე სერიოზული საუბარი ჩვენი მხრიდან უხერხულიც კი არის“, -თქვა კილაძემ.

როგორც მუხთარლიმ რუსთავი 2-თან ინტერვიუში განუცხადა, ის თბილისიდან კრიმინალური პოლიციის თანამშრომლებმა გაიტაცეს, ხოლო პროცესს აკონტროლებდა საქართველოს პრემიერ-მინისტრი გიორგი კვირიკაშვილი. მან ასევე ისაუბრა ბიძინა ივანიშვილისა და აზერბაიჯანის პრეზიდენტის, ილჰამ ალიევის ბიზნესინტერესებზე.

აფგან მუხთარლი თბილისში 29 მაისს გაუჩინარდა, შემდგომ გაირკვა, რომ ის აზერბაიჯანში დააკეს. ბელაქნის სასამართლომ საზღვრის უკანონოდ გადაკვეთის, საზღვარზე 10,000 ევროს არადეკლარირებულად გადატანასა და მესაზღვრისთვის წინააღმდეგობის გაწევის გამო, 6 წლით თავისუფლების აღკვეთა მიუსაჯა.