სამართალი

ადვოკატები ბათუმის საქალაქო სასამართლოს თავმჯდომარისთვის უფლებამოსილების შეჩერებას მოითხოვენ

ადვოკატების ნაწილი ბათუმის საქალაქო სასამართლოს თავმჯდომარე დავით მამისეიშვილისთვის უფლებამოსილების შეჩერებას ითხოვს.

აღნიშნული მოთხოვნა ადვოკატებმა დღეს ბათუმის დემოკრატიული ჩართულობის ცენტრში ბრიფინგზე გაახმოვანეს.

მათი განცხადებით, მოსამართლე ირაკლი შავაძის მიერ გაკეთებული განცხადებები საგამოძიებო ორგანომ უნდა შეისწავლოს.

ადვოკატები მოსამართლის მხარდასაჭერ აქციებს აანონსებენ და ამბობენ, რომ ბათუმის საქალაქო სასამართლოს მოსამართლე ირაკლი შავაძის მხარდასაჭერად ხელმოწერების შეგროვება დაიწყეს.

"შიგნით რა დაპირისპირებაა არ ვიცით, თუმცა როცა მოქმედი მოსამართლე ზეწოლაზე საუბრობს აუცილებელია ფაქტი გამოიძიონ. ასევე აუცილებელია პარლამენტში შეიქმნას საგამოძიებო კომისია. ის, რაზეც ირაკლი შავაძემ ისაუბრა, ქართულ მართლმსაჯულებას ჩრდილქვეშ აყენებს. გამორიცხული არ არის გადაწყვეტილებებს პირადი ინტერესებით იღებდნენ. ირაკლი შავაძე არის თავის საქმის პროფესიონალი. ჩვენ მოვითხოვთ მოსამართლის განცხადების საფუძველზე გამოძიების დაწყებას, გამოძიების დასრულებამდე კი უნდა შეუჩერდეს უფლებამოსილება დავით მამისეიშვილს", - აცხადებს ადვოკატი ირმა ზოიძე.

ცნობისათვის, ბათუმის საქალაქო სასამართლოს მოსამართლე, ირაკლი შავაძე სასამართლოს თავმჯდომარეს დავით მამისეიშვილს ზეწოლაში ადანაშაულებს და ამბობს, რომ თავმჯდომარესთან შეუთანხმებელი გადაწყვეტილებების გამო დევნიდნენ.

ნინო ექვთიმიშვილი