რეგიონები

ბათუმის საქალაქო სასამართლოს მოსამართლე სასამართლოს თავმჯდომარეს მართლმსაჯულების განხორციელებაში ხელის შეშლაში ადანაშაულებს

ბათუმის საქალაქო სასამართლოს მოსამართლე, ირაკლი შავაძე სასამართლოს თავმჯდომარეს დავით მამისეიშვილს ზეწოლაში ადანაშაულებს და ამბობს, რომ თავმჯდომარესთან შეუთანხმებელი გადაწყვეტილებების გამო დევნიდნენ.

მოსამართლე ირწმუნება, რომ სწორედ ამ დამოკიდებულების გამო უთხრეს უარი უვადოდ დანიშვნაზე.

ირაკლი შავაძე ფაქტების გასაჯაროებას გეგმავს და დახმარებისთვის არასამთავრობო სექტორს მიმართავს.

„ბათუმის საქალაქო სასამართლოს თავმჯდომარე დავით მამისეიშვილი შეგნებულად მიშლიდა ხელს, რომ განმეხორციელებინა მართლმსაჯულება. მიქმნიდა პრობლემებს, დაიწყო კავშირების გაბმა პროკურატურაში, შეთანხმებულად დაიწყეს თავდასხმა და იუსტიციის უმაღლეს საბჭოში დისციპლინური დევნის საკითხები დააყენეს. ყოველივე ამის უკან რომ თვითონ დგას, მე ამის მტკიცებულებები შემიძლია მივაწოდო შესაბამის უწყებებს“, – აცხადებს ირაკლი შავაძე ჟურნალისტებთან საუბრისას.