სამართალი

ზვიად რატიანის საქმეზე ვიდეომასალის გავრცელება იყო არასასიამოვნო ფაქტი - შსს

შსს-ის იურისტის ბექა დოჭვირის განცხადებით, ზვიად რატიანის საქმესთან დაკავშირებული ვიდეომასალის გავრცელება არასასიამოვნო ფაქტი იყო.

„სასამართლომ სრულად გაიზიარა ჩვენ მიერ წარდგენილი მტკიცებულებები და ბატონი ზვიად რატიანი ცნო ადმინისტრაციულ სამართალდამრღვევად წვრილმან ხულიგნობასა და პოლიციისადმი დაუმორჩილებლობაში. როგორც ჩანს, სასამართლომ ლმობიერი გადაწყვეტილება მიიღო იქიდან გამომდინარე, რომ ბატონმა ზვიადმა, ფაქტობრივად, აღიარა სამართალდარღვევა. რაც შეეხება მის ბრალდებებს პოლიციისადმი, აღნიშნულთან დაკავშირებით მიმდინარეობს გამოძიება პროკურატურაში და ჩვენ ვიქნებით მაქსიმალურად ღია, ობიექტური და ვითანამშრომლებთ გამოძიებასთან. გეთანხმებით, რომ ვიდეომასალის გავრცელება იყო არასასიამოვნო ფაქტი“, - თქვა დოჭვირმა სასამართლოს პროცესის შემდეგ.

შსს-ის იურისტს არ უპასუხია კითხვაზე, ვინ მიიღო გადაწყვეტილება ვიდეომასალის გამოქვეყნების სესახებ.

თბილისის საქალაქო სასამართლოს მოსამართლემ პოეტი ზვიად რატიანი ადინისტრაციულ სამართალდარღვევათა საქმეში დამნაშავედ ცნო და 2000-ლარიანი ჯარიმა დააკისრა.

პოეტს ედავებოდნენ ადმინისტრაციული კოდექსის 166-ე და 173-ე მუხლების დაღვევას, რაც გულისხმობს წვრილმან ხულიგნობასა და პოლიციელისადმი წინააღმდეგობას.

ზვიად რატიანი 24 დეკემბრის ღამეს, საპოლიციო შემოწმების დროს დააკავეს. პატრულის თანამშრომლების ნაამბობიდან გამომდინარე, პოეტი ნასვამი იყო და სამართალდამცველებს აგინებდა, ხოლო თავად პოეტი ამბობს, რომ სამართალდამცველებმა მასზე ფიზიკურად და ფსიქოლოგიურად იძალადეს.

ანა მებურიშვილი