სამართალი

ზვიად ნაზღაიძე ადასტურებს პროკურატურაში მის დაკითხვას

მოსამართლე ნატა ნაზღაიძის ძმა, ზვიად ნაზღაიძე ადასტურებს, რომ მთავარ პროკურატურაში დაკითხვაზე იმყოფებოდა, თუმცა არ აკონკრეტებს, როდის მოხდა მისი დაკითხვა.

ამასთან, ზვიად ნაზღაიძე ამბობს, რომ სახელმწიფოს მიერ მისთვის ნაკვეთის გადაცემისა საქმეზე სავარაუდოდ, დაიწყება გამოძიება.

,,არ არის აუცილებელი, რომ გითხრათ, როდის დავიკითხე. მიდით პროკურატურაში და ყველა ინფორმაცია იქ იქნება. სავარაუდოდ, იქნება გამოძიება, იმიტომ, რომ დამკითხეს’’, - აცხადებს ზვიად ნაზღაიძე.

რაც შეეხება ევროპული საქართველოს წევრის, ირაკლი აბესაძის მიერ დღეს გავრცელებულ ინფორმაციას, რომ ნაზღაიძის ოჯახმა ნაკვეთის ზვიად ჩოხელზე გადაფორმების პროცედურა ოფიციალურად დაიწყო, ზვიად ნაზღაიძე აღნიშნულს არ უარყოფს და ამბობს, რომ ყველაფერი სამართლებრივად ხორციელდება.

,,მე მგონი, საკმარისი დოკუმენტები დავდეთ მეც და ზვიადმაც ამ ისტორიასთან დაკავშირებით და საკმარისად მივაწოდეთ ინფორმაცია. აღარ გიპასუხებთ ზედმეტ შეკითხვებზე’’, - განუცხადა ზვიად ნაზღაიძემ რუსთავი 2-ს.

ნინი ექვთიმიშვილი