პოლიტიკა

ზვიად კუპრავა თვითმხილველი არაა, ის პირდაპირ მხარეა - ეკა ბესელია საგამოძიებო კომისიის სხდომაზე კუპრავას დაბარებას შეცდომას უწოდებს

ხორავას ქუჩაზე მოზარდების მკვლელობის საქმის შემსწავლელი დროებითი საპარლამენტო საგამოძიებო კომისიის წევრმა, ეკა ბესელიამ შეცდომა უწოდა ამ ეტაპზე სამართალდამცველთა რეფორმის ცენტრის ხელმძღვანელის, ზვიად კუპრავას დაბარებას დაკითხვაზე.

დეპუტატის თქმით, უმჯობესი იქნებოდა, თავდაპირველად დაკითხულიყო ყველა მოწმე.

„არა მგონია, რომ სწორია საგამოძიებო კომისიის გადაწყვეტილება, იმ პირებზე ადრე, ვინც უშუალოდ დაკავშირებულია, შემსწრეა ან პირველწყაროა, ზვიად კუპრავა დაიკითხოს. კუპრავა თვითმხილველი არ არის. გასაგებია მისი პოზიცია. ის პირდაპირ მხარეა. ამიტომ ამ ადამიანის კომისიის დღევანდელ სხდომაზე მოწვევა და დღეს გამოკითხვა, არა მგონია, რომ სწორი გადაწყვეტილება იყოს. ეს იყო შეცდომა. კომისიას აქვს მაღალი ვალდებულებები, პასუხისმგებლობა და საჭიროა პოლიტიკური განწყობებისგან გათავისუფლდეს“, - განაცხადა ბესელიამ.

კომისიის დღევანდელ სხდომაზე ზვიად კუპრავას გამოკითხავენ, ასევევ მოუსმენენ ხორავას ქუჩის საქმის გამომძიებელ ირაკლი ფიფიას, დეტექტივების სამმართველოს უფროს იოსებ სიგუასა და თბილისის პოლიციის დეპარტამენტის უფროსს, შალვა ბედოიძეს.