სამართალი

ზურაბ ჯაფარიძე სასამართლოს მიერ დაკისრებული 2000 ლარის გადახდას არ აპირებს

მე არ ვაპირებ ამ 2000-ლარიანი ჯარიმის გადახდას. ამასთან, ყველაფერს ვიზამ, რომ სისტემაში დამნაშავე პირები დაისაჯონ, - აცხადებს „გირჩის“ ლიდერი ზურაბ ჯაფარიძე „ფეისბუქის“ ვიდეო მიმართვაში.

როგორც ჯაფარიძე ამბობს, ის გააუქმებს საკუთარ ანგარიშს ბანკში, რათა სახელმწიფომ „ვერც ერთი ლარი ვერ წაიღოს“ მისგან.

„მე ამ თანხის გადახდა არ მეკუთვნის, შესაბამისად, სახელმწიფოს მოუწევს ჩემგან ძალით ამოიღოს ეს 2000 ლარი. მე უკვე ველაპარაკე ბანკში ჩემს ბანკირს. ერთადერთი პრობლემა, რაც შეიძლება იყოს, არის ის, რომ მე და ჩემს მეუღლეს გვაქვს სესხი აღებული, ბინა გვაქვს ნაყიდი და ჩემი ანგარიშიდან იჭრება თანხა. სავარაუდოდ, მოვახერხებ, რომ ავტომატური ჩამოჭრა ჩემი მეუღლის ანგარიშიდან მოხდეს.

მე გავასუფთავებ ყველა ჩემს ანგარიშს და ჩემი საბანკო ანგარიშიდან ვერც ერთ ლარს ვერ წაიღებს სახელმწიფო. ამის შემდეგ სახელმწიფოს დარჩება ერთადერთი გზა, ჩემს საკუთრებაში არსებული ბინა, რომელიც ყიფშიძეზეა და ჩემი მოხუცი მშობლები ცხოვრობენ და მე გარანტიას ვაძლევ სახელმწიფოს, რომ ამ ბინას ისინი ვერ გაყიდიან და მშობლებს გარეთ ვერ გამოყრიან“, - განაცხადა ზურაბ ჯაფარიძემ.

მისივე თქმით, მას დანაშაული არ ჩაუდენია და სასამართლოში შვიდმა პოლიციელმა მოიტყუა, ჩაიდინა სისხლის სამართლის დანაშაული და თქვეს, თითქოს ის იგინებოდა.

„პოლიციელებმა ჩაიდინეს სისხლის სამართლის დანაშაული, მოიტყუეს. მე ამ საქმეს მივყვები ბოლომდე და მივაღწევ იმას, რომ სისტემის შიგნით ვიღაცები დაისაჯონ. მიზანი არ არის, რომ რიგითი პოლიციელები დაისაჯონ. მე მაინტერესებს ვინ იძლევა ამ დავალებებს“, - განაცხადა ზურაბ ჯაფარიძემ.

ცნობისათვის, თბილისის საქალაქო სასამართლომ პარტია „გირჩის“ ლიდერებს გამამტყუნებელი განაჩენი გამოუტანა. სასამართლომ გაიზიარა ბრალდების მხარის პოზიცია და პარტიის ლიდერები წვრილმან ხულიგნობასა და სამართალდამცველთა მიმართ დაუმორჩილებლობაში დამნაშავედ ცნო.

მოსამართლის გადაწყვეტილებით, პარტიის ლიდერი ზურაბ ჯაფარიძე 2 000 ლარით დაჯარიმდა, ხოლო პარტიის ორ წევრს იაგო ხვიჩიას და ვახტანგ მეგრელიშვილს ათდღიანი პატიმრობა შეეფარდათ.

ნინო ექვთიმიშვილი