პოლიტიკა

ზაზა სარალიძემ გუშინ სასამართლოს სასადილოს ინციდენტში მონაწილე პოლიციელთა სამსახურიდან დათხოვნა და დაკავება მოითხოვა

ხორავას ქუჩაზე მოკლული მოზარდის, დავით სარალიძის მამა, ზაზა სარალიძე შსს-ის გენერალურ ინსპექციაში მივიდა. სარალიძის განმარტებით, მისი მისვლა გუშინ სასამართლოს სასადილოში მომხდარ ინციდენტს უკავშირდება.

„უპირველეს ყოვლისა, მე არ უნდა მიმემართა, თავად უნდა დაეწყოთ რეაგირება იმაზე, რაც გუშინ სასამართლოს სასადილოში მოხდა, მაგრამ რომ ვნახე, არანაირი რეაგირება არ არის, მე თვითონ დავუკავშირდი გენინსპექციას და მოვითხოვე რეაგირება.

დღეს დამიბარეს და ვისაუბრებ იმ დეტალებზე, რაც მოხდა იქ. ჩვენ ვისხედით, ვჭამდით საჭმელს, შემოცვივდნენ სასადილოში და მოსთხოვეს ზვიად კუპრავას დარბაზში ასვლა, მოსამართლე გიბარებსო, არადა, ეს იყო მოგონილი. ამის შემდეგ მაშინვე ძალადობაზე გადავიდნენ, ძალით გაათრიეს ზვიად კუპრავა, თავზე დაგვამხეს მაგიდა, გადმოგვიყარეს საჭმელ-სასმელი, დავით ლაგვილავას ხელით შეეხნენ, ჯიკაობის დროს ჩემკენაც გამოიწიეს. ეს იყო სრული მარაზმი, ჭამა არ გვაცადეს ელემენტარულად. სამართალდამცავი იქით უნდა გიცავდეს და პირიქით მოდის ზეწოლაზე“, - განაცხადა სარალიძემ.

ზაზა სარალიძემ მ ინციდენტში მონაწილე სამართალდამცველთა გათავისუფლება და დაკავება მოითხოვა.

„გადაცდომა კი არა, დასაკავებლები არიან ყველანი. ვინც იყო იქ პოლიციელი, ყველა დასაჭერია. კონკრეტული პოლიციელების მიმართ ვითხოვ რეაგირებას, ხელმძღვანელები კი თვითონ გადაწყვიტონ, არიან თუ არა დასაჭერები. კონკრეტული პოლიციელები განთავისუფლებული უნდა იყვნენ სამსახურიდან
და შესაბამისი სამართლებრივი ფორმა უნდა მიეცეს ყველაფერს“, - განაცხადა სარალიძემ.