პოლიტიკა

ზაზა სარალიძე და ზვიად კუპრავა პრემიერ-მინისტრთან შეხვედრას ითხოვენ

„სამართალდამცავთა რეფორმირების ცენტრის“ ხელმძღვანელმა ზვიად კუპრავამ და ხორავას ქუჩაზე მოკლული დავით სარალიძის მამამ, ზაზა სარალიძემ პრემიერ-მინისტრ მამუკა ბახტაძესთან შეხვედრა მოითხოვეს. ამის შესახებ მათ ერთობლივ პრესკონფერენციაზე განაცხადეს.

კუპრავას ინფორმაციით, 5 დღის განმავლობაში მათ ცენტრში უკვე შესულია 25-ზე მეტი საქმე, რომლებიც მათმა იურისტებმა ინდივიდუალურად შეისწავლეს და თითოეულ საქმეზე სახელმწიფოს მხრიდან კონკრეტული პირების მიმართ ჩაგვრა და ძალადობა იკვეთება. მისივე თქმით, მათთან შესული განაცხადები ეხება მძიმე დანაშაულებებს, მკვლელობებს.

„31 ივლისს, 12:00 საათზე, მთავრობის ადმინისტრაციაში შევიტანთ აღნიშნულ საქმეებს, რათა ახალი პრემიერ-მინისტრი თავად გაეცნოს პრობლემის არსს და წინ აღუდგეს იმ ძალადობრივ სისტემას, რომელიც ამ ადამიანებს ჩაგრავს. ამ ადამიანებმაც უნდა იგრძნონ, რომ არიან სახელმწიფოს სრულფასოვანი წევრები, სრულფასოვანი მოქალაქეები“, - აღნიშნა კუპრავამ.

მისივე თქმით, ხელისუფლებასა და პროკურატურას ისინი გონივრულ ვადას მისცემენ, რათა აღნიშნულ საქმეებთან დაკავშირებით სრულფასოვანი გამოძიების წარმოება მოახერხონ, ხოლო პრემიერმა პირად კონტროლზე უნდა აიყვანოს ამ საქმეების წარმოება.

კუპრავას აზრით, ამ საქმეების გამოსაძიებლად საჭიროა პოლიტიკური ნება.

თავის მხრივ, ზაზა სარალიძემ განაცხადა, რომ საქართველოში არის შერჩევითი სამართალი.

„რა უსამართლობის წინაშე მე ვდგავარ, იმ უსამართლობის წინაშე დგანან ეს პირები. ფაქტია, საქართველოში არსებობს შერჩევითი სამართალი და ამ შერჩევითი სამართალის მსხვერპლი ვართ ჩვენ“, - განაცხადა სარალიძემ.

მისივე თქმით, თუკი ახალი პრემიერ-მინისტრი მათთან შეხვედრას მოისურვებს, აღნიშნული საქმეების გარდა, პირადად გააცნობს მისი შვილის მკვლელობის საქმის დეტალებსაც.

„თუ პრემიერი არ შეგვხდება, გამოვა, რომ იგი თავს არიდებს ამ საქმის გამოძიებას და არ უნდა, რომ საქართველოში შერჩევითი სამართალი მოისპოს“ , - განაცხადა სარალიძემ.