სამართალი

ზაზა სარალიძე და მალხაზ მაჩალიკაშვილი სტრასბურგში გაემგზავრებიან

ზაზა სარალიძე და მალხაზ მაჩალიკაშვილი 5 აგვისტოს, სტრასბურგში, ევროპელ ადვოკატებთან და უფლებადამცველებთან შესახვედრად გაემგზავრებიან.

როგორც მათ დღეს გამართულ ბრიფინგზე აღნიშნეს, ისინი ევროპელ უფლებამადამცველებს ხორავას ქუჩაზე მომხდარი საქმისა და თემირლან მაჩალიკაშვილის საქმის დეტალებს გააცნობენ.

გაცნობითი შეხვედრის შემდეგ სტრასბურგის ადამიანის უფლებათა სასამართლოში სახელმწიფოს წინააღმდეგ სარჩელის შესატანად მომზადებას დაიწყებენ, რა პროცესშიც როგორც ქართველი, ისე ევროპელი იურისტები ჩაერთვებიან.

დღესვე, მალხაზ მაჩალიკაშვილი და ზაზა სარალიძე შსს-სა და სუს-ისთვის წერილობით მიმართვას გეგმავენ, რადგან მათ ეჭვი აქვთ, რომ მალხაზ მაჩალიკაშვილს შესაძლოა, საზღვრის კვეთასთან დაკავშირებული პრობლემები შეექმნას.

,,ფაქტია, დავდექით იმის წინაშე, რომ აუცილებლად უნდა მივმართოთ ევროპის სასამართლოს დახმარებისთვის, რომ როგორმე მაინც დავადგინოთ ჩვენს შვილებთან დაკავშირებული უმსგავსო გამოძიება, რასაც პროკურატურა აწარმოებდა. დღესაც ცდილობენ არამარტო მოქმედი, არამედ გადამდგარი და დაწინაურებული პროკურორებიც, ჩემი შვილის საქმის შეკერვას. პირდაპირ მკვლელებს არ ეხებიან და გამოძიება ირიბად მიყავთ. იქიდან გამომდინარე, რომ საქართველოში ვერ ვპოულობ სამართალს, მიწევს დახმარებისთვის ქვეყნის ფარგლებს გარეთ გასვლა,”- განაცხადა ზაზა სარალიძემ.

ნინო ექვთიმიშვილი