საზოგადოება

ზაზა ოქუაშვილის განცხადება გონიერი ბიზნესმენის მიერ გაკეთებული განცხადებაა _ ვასილ მაღლაფერიძე

მე-9 არხის შესყიდვის მიზნით სააქციო საზოგადოების შექმნის ერთ-ერთი ინიციატორი, პუბლიცისტი ვასილ მაღლაფერიძე მიიჩნევს, რომ ბიზნესმენ ზაზა ოქუაშვილის მიერ დღეს გავრცელებული განცხადება ვითარების ადეკვატურია.

როგორც მაღლაფერიძემ ,,მედიანიუსთან“ საუბრისას აღნიშნა, ეს არის გონიერი ბიზნესმენის მიერ გაკეთებული განცხადება, რომელმაც იცის, რომ ველური კაპიტალით კი არ უნდა იმოქმედოს ბიზნესმენმა, არამედ საზოგადოებისადმი პატივისცემით.

,, ვფიქრობ, ეს პატივისცემა მას პატივისცემად დაუბრუნდება საზოგადოების მხრიდან. გარდა ამისა, ის კარგად ერკვევა მედიაში და თუ სურვილს გამოთქვამს, ის იქნება სააქციო საზოგადოების წევრი და ეს იქნება მისი მხრიდან სამოქალაქო სოლიდარობის გამოხატულება“, _ განაცხადა მაღლაფერიძემ და დასძინა, რომ ოქუაშვილის წინადადება არის დროული და ბევრ რამეს მოჰფენს სინათლეს.

მისივე თქმით, ზაზა ოქუაშვილის განცხადება ნათელს მოჰფენს შეკითხვას _ მართლაც იყიდება თუ არა ტელევიზია.

,,ჩვენ დღემდე არ ვიცით, კონკრეტულად რა შედის იმ პაკეტში, რომელიც იყიდება, რა ღირებულებაა, რა პირობებია, ან თუნდაც, ვინ არის ის ადამიანი, რომელსაც დაევალა ტელევიზიის გაყიდვის საკითხის მოგვარება. საზოგადოებამ ამის შესახებ ჯერჯერობით არაფერი იცის და ვფიქრობ, რომ ოქუაშვილის განცხადება ამ საკითხშიც სინათლეს შემოიტანს“, _ აღნიშნა მაღლაფერიძემ.

შეგახსენებთ, რომ რამდენიმე დღის წინ, “იბერია თV”-ს დამფუძნებლებმა განცხადება გაავრცელეს, რომელშიც ნათქვამი იყო, რომ “იბერია თV” გეგმავს მაუწყებლობის აღდგენას და დამფუძნებლები გამოთქვამენ სურვილს და მზადყოფნას, განიხილონ ტელეკომპანია “მე-9 არხის” ჟურნალისტებისა და ტექნიკური რესურსის მიღების შესაძლებლობა.

ბიზნესმენმა ზაზა ოქუაშვილის მიერ დღეს გავრცელებულ განცხადებაში კი ნათქვამია: "მქონდა სურვილი და გამოვხატე მზადყოფნა, მონაწილეობა მიმეღო "მე-9 არხის” ან მისი ტექნიკური რესურსის მიღებაში, მით უფრო, რომ ძალიან მგრძნობიარე ვარ მედიაბიზნესის მიმართ, რომელიც მქონდა ტელეკომპანია "იბერიის" სახით. მეორე მხრივ, გამოიხატა იგივე სურვილი სააქციო საზოგადოების მიერ. პატივს ვცემ თითოეული მათგანის გულწრფელ სურვილს, რომ უნდათ დამოუკიდებელი და პოლიტიკურად თავისუფალი ტელევიზიის არსებობა, რასაც მეც მივესალმები. სააქციო საზოგადოებაში ახლა უკვე შედის ათასობით ადამიანი. ჩემი მხრივ, არ მიმაჩნია გამართლებულად, რომ ვიყო მათი კონკურენტი. უფრო მეტიც, ვუსურვებ წარმატებებს".