სამართალი

ზაზა ხატიაშვილი პროკურატურის წარმომადგენელს ადვოკატ ცოტნე ტყებუჩავასთან მიმართებაში უკანონო ქმედებაში ადანაშაულებს

ადვოკატთა ასოციაციის თავმჯდომარე ზაზა ხატიაშვილი მთავარი პროკურატურის წარმომადგენელს ადვოკატ ცოტნე ტყებუჩავასთან მიმართებაში უკანონო ქმედებაში ადანაშაულებს.

აღნიშნულის შესახებ საუბარია ზაზა ხატიაშვილის განცხადებაში, რომელსაც მედიანიუსი უცვლელად გთავაზობთ:

,,საქართველოს პროკურატურის უკანონო მოქმედებებს ადვოკატებთან მიმართებაში არ აქვს დასასრული. პროკურორებმა ელემენტარულად ვერ ისწავლეს, რომ ადვოკატის გამოკითხვა არ შეიძლება იმ შემთხვევაში თუ ადვოკატი მოქმედებდა თავისი საადვოკატო უფლებამოსილების განხორციელების დროს. პროკურორი და ადვოკატი წარმოადგენენ მხარეებს სისხლის სამართლის პროცესში. წარმოუდგენია ვინმეს, რომ ადვოკატს თვითონ მოუნდეს იმ პროკურორის გამოკითხვა, რომელიც გამოდის კონკრეტულ საქმეზე როგორც პროკურორი? ადვოკატებმა იციან, რომ აღნიშნული მოქმედების ჩატარება არ შეიძლება და ამგვარ პროცესუალურ აბსურდს არასოდეს არ მიმართავენ, სასამართლოში პროკურორის გამოძახების და დაკითხვის გარდა.

ადვოკატი ცოტნე ტყებუჩავა გახდა სავარაუდოდ, მთავარი პროკურატურის პროკურორის ვინმე „გრიგოლის“ დაშინების ობიექტი.

2017 წლის 29 ივნისს ადვოკატ ცოტნე ტყებუჩავას მობილურ ტელეფონზე დაურეკა უცნობმა პირმა რომელიც გაეცნო, როგორც „პროკურორი გრიგოლი“, რომელმაც სთხოვა ადვოკატს მისულიყო მთავარ პროკურატურაში მისი დაცვის ქვეშ მყოფი პირის მსჯავრდებული კახაბერ ლომიძის განცხადების და მის მიერ მიცემულ ინტერვიუსთან მიმართებაში. როდესაც ადვოკატმა განაცხადა უარი პროკურატურაში ვიზიტზე და განუცხდა „პროკურორ გრიგოლს“, რომ მისი გამოკითხვა არ შეიძლებოდა ვინაიდან იგი ახორციელებს კონკრეტული პირის დაცვას და მოქმედებდა როგორც ადვოკატი, „პროკურორმა გრიგოლიმ“ უკვე ხმას აუწია და შეეცადა ადვოკატის დაშინებას თავისი სტატუსით. „პროკურორმა გრიგოლიმ„ მოსთხოვა ადვოკატს მისულიყო პროკურატურაში, მაგრამ ადვოკატის კატეგორიული უარის შემდეგ „პროკურორმა გრიგოლიმ“ ტელეფონი გათიშა.

საქართველოს მთავარი პროკურატურის პროკურორის, ვინმე „პროკურორი გრიგოლის“ უკანონობის გამო, ადვოკატ ცოტნე ტყებუჩავასთან მიმართებაში სავარაუდოდ ადგილი ჰქონდა დაცვის განხორციელებისთვის ხელისშეშლის მიზნით ადვოკატის საქმიანობაში ამა თუ იმ ფორმით უკანონო ჩარევას, რომელიც დასჯადია სისხლის სამართლის კოდექსის 364-მუხლის მიხედვით.

„პროკურორი გრიგოლი“-ის მხრიდან განხორციელებული ქმედებები ასევე წინააღმდეგობაში მოდის გაეროს ძირითადი პრინციპებთან ადვოკატის როლის შესახებ (1990).

კერძოდ მე–16 მუხლის თანახმად:

“ხელისუფლებამ უნდა უზრუნველყოს, რომ ადვოკატებს (ა) შეუძლიათ, შეასრულონ თავიანთი პროფესიული ფუნქციები დაშინების, დაბრკოლების, შევიწროების ან უადგილო ჩარევის გარეშე;
ადვოკატთა ასოციაცია მოითხოვს ეფექტური გამოძიების ჩატარებას ადვოკატ ცოტნე ტყებუჩავასთან მიმართებაში განხორციელებული უკანონო მოქმედებების გამო.’’