პოლიტიკა

ზაალ უდუმაშვილი მოუწოდებს პრეზიდენტს, დროულად გამოაცხადოს საპრეზიდენტო არჩევნების თარიღი

„ერთიანი ნაციონალური მოძრაობის“ ერთ-ერთი ლიდერის, ზაალ უდუმაშვილის განცხადებით, საპრეზიდენტო არჩევნების თარიღის „გაჭიანურება მხოლოდ და მხოლოდ, ხელისუფლების წისქვილზე ასხამს წყალს და კონკრეტულად, ბიძინა ივანიშვილის“.

უდუმაშვილმა მოუწოდა ქვეყნის პრეზიდენტ გიორგი მარგველაშვილს , რომ მან დროულად გამოაცხადოს საპრეზიდენტო არჩევნების თარიღი, რაც არჩევნებში მონაწილე ყველა ფიგურანტს წინასაარჩევნო კამპანიის ნორმალურად წარმართვის შესაძლებლობას მისცემს.

„ჩვენ მოვუწოდებთ საქართველოს პრეზიდენტს, რომ დროულად გამოაცხადოს არჩევნების თარიღი და არ იყოს ის დამოკიდებული იმაზე, თუ თავად რა გადაწყვეტილებას მიიღებს - დააყენებს თუ არა კანდიდატურას ან რას ურჩევს მას „ქართული ოცნება“, რომ მიეცეს ყველას, ნორმალურად ჩაერთოს წინასაარჩევნო კამპანიაში, განსაკუთრებითი კი ოპოზიციას“, - განაცხადა უდუმაშვილმა.

მისივე თქმით, მმართველ პარტიაში განხეთქილებაა, რასაც მოწმობს ის, რომ საპრეზიდენტო კანდიდატზე ამ დრომდე ვერ შეთანხმდნენ.

„დღეს „ქართული ოცნება“ ძალიან ცუდ მდგომარეობაშია ჩავარდნილი, იმიტომ, რომ დღემდე ვერ გადაწყვიტა, ეყოლება თუ არა საკუთარი კანდიდატი. ეს იმას ნიშნავს, რომ შიგნით, „ქართულ ოცნებაში“ არის სერიოზული განხეთქილება“, - განაცხადა უდუმაშვილმა.

დღემდე უცნობია, დააყენებს თუ არა „ქართული ოცნება“ თავის კანდიდატს საპრეზიდენტო არჩევნებზე.

რაც შეეხება გიორგი მარგველაშვილს, მან, სავარაუდოდ, კვირის ბოლომდე უნდა დაასახელოს არჩევნების თარიღი.