სამართალი

ვიცით, როგორი შეხმატკბილებულები არიან ძალოვან სტრუქტურებთან იგივე შორენა თეთრუაშვილი და მთავარი მოწმე - მიხეილ რამიშვილი

ვის გულისხმობს პროკურატურა ჩვენებების გავრცელებაში, გამოჩნდება, - განუცხადა ჟურნალისტებს ე.წ. ციანიდის საქმის ადვოკატმა მიხეილ რამიშვილმა თბილისის პროკურატურაში შესვლამდე.

"მე დარწმუნებული ვარ, რომ ეს შეხვედრა დაკავშირებული იქნება იმასთან რაც ტელევიზიით გასაჯაროვდა. ვის იგულისხმებენ პროკურატურაში, გამოჩნდება. მე არ მაქვს ინფორმაცია ვინ გაავრცელა ეს მასალები",- განაცხადა რამიშვილმა.

ადვოკატი არ გამორიცხავს, რომ აღნიშნული მასალები საპატრიარქოდანაა გავრცელებული.

"მე არ გამოვრიცხავ საპატრიარქოს გარკვეულ პირებსაც მიუწვდებოდეთ ხელი ამ ჩანაწერებზე, მით უმეტეს, ჩვენ ვიცით, როგორი შეხმატკბილებულები არიან ძალოვან სტრუქტურებთან იგივე შორენა თეთრუაშვილი და მთავარი მოწმე",- აღნიშნა რამიშვილმა.

ცნობისათვის, საქმე ეხება გამოძიებას, რომელიც ე.წ. ციანიდის საქმის დახურული სასამართლო პროცესების ამსახველი მასალების მედიასაშუალებებში გავრცელების ფაქტებზე დაიწყო.

მთავარი პროკურატურის ინფორმაციით, მედიაში სხვადასხვა პერიოდში გავრცელდა დახურულ სასამართლო პროცესზე, პატრიარქის დაცვის ყოფილი უფროსის სოსო ოხანაშვილის, პატრიარქის მდივან-რეფერენტის შორენა თეთრუაშვილის, მეუფე დიმიტრის ჩვენებები და ასევე დეკანოზ გიორგი მამალაძის საბოლოო სიტყვა. გამოძიება გამოძიების მონაცემების გახმაურების ფაქტებზე, საქართველოს სისხლის სამართლის კოდექსის 374-ე მუხლით გათვალისწინებული დანაშაულის ნიშნებითაა დაწყებული.