პოლიტიკა

ვისაუბრეთ თავდაცვისა და უსაფრთხოების საკითხებზე, ეს მთავარი მიმართულებაა სტრატეგიულ პარტნიორებთან - დავით ზალკალიანი

საქართველოს საგარეო საქმეთა მინისტრის დავით ზალკალიანის განცხადებით, ეროვნული უშიშროების საკითხებში აშშ-ის პრეზიდენტის, დონალდ ტრამპის მრჩეველ ჯონ ბოლტონთან შეხვედრაზე მხარეებმა ისაუბრეს საქართველო-ამერიკის სტრატეგიული პარტნიორობის ყველა ძირითად მიმართულებაზე.

მისი თქმით, ჯონ ბოლტონთან ისაუბრეს ასევე იმ რეგიონალურ და გლობალურ გამოწვევებზე, რომელთანაც გამკლავება უხდება საქართველოს.

„ჩვენი სტრატეგიული პარტნიორის, აშშ-ის გარეშე, ძალიან გაგვიჭირდება ამ პრობლემებთან და გამოწვევებთან გამკლავება. აშშ-ი ამას ძალიან კარგად აცნობიერებს.

ბუნებრივია, საუბრის მთავარი თემა უსაფრთხოების კუთხით ოკუპირებულ ტერიტორიებზე შექმნილი მდგომარეობა იყო, ამ მიმართულებით ჩვენ სტრატეგიული პარტნიორისგან გვაქვს მხარდაჭერა. საკითხი მუდმივად დგას ამერიკული პოლიტიკის დღის წესრიგში. ეს თემა რუსეთის ფედერაციასთან ორმხრივი დიალოგის საგანია და ჩვენთვის ძალიან მნიშვნელოვანია ამერიკის მხარდაჭერა. ბუნებრივია, ვისაუბრეთ, როგორ შეიძლება ამ სიტუაციიდან გამოსვლა იმ ინიციატივებით, რომელიც საქართველოს გააჩნია. ერთ-ერთი მნიშვნელოვანი მიმართულება არის ასევე საერთაშორისო თანამეგობრობის მეტი ჩართულობა“, – განაცხადა ზალკალიანმა.

როგორც მინისტრმა აღნიშნა, აშშ-ის უშიშროების საბჭოს მდივანთან ეკონომიკურ საკითხებზეც ისაუბრეს. ზალკალიანის თქმით, შეხვედრაზე აღნიშნა, რომ აუცილებელია, აშშ-საქართველოს ეკონომიკური ურთიერთობები იმ მაღალ ნიშნულამდე მივიდეს, როგორც არის პოლიტიკის, სამხედრო და უსაფრთხოების სფეროში.

„აქაც გვაქვს სრული გაგება ჩვენი სტრატეგიული პარტნიორების მხრიდან, კერძოდ, თავისუფალი ვაჭრობის შეთანხმების მიღწევის თვალსაზრისით. ამ მიმართულებით სერიოზული სამუშაოები უკვე ჩატარებული გვაქვს და მომავალშიც გაგრძელდება. ვისაუბრეთ ასევე თავდაცვისა და უსაფრთხოების საკითხებზე, ეს მთავარი მიმართულებაა სტრატეგიულ პარტნიორებთან“, – განაცხადა ზალკალიანმა.

სამხრეთ კავკასიური ტურნეს ფარგლებში აშშ-ის უშიშროების საბჭოს მდივანი და ეროვნული უსაფრთხოების საკითხებში პრეზიდენტ დონალდ ტრამპის მრჩეველი ჯონ ბოლტონი საქართველოს ეწვია.