პოლიტიკა

ვის დაუჭერს „ქართული ოცნება“ მხარს, გამოჩნდება მას შემდეგ, რაც შესაძლებლობა მოგვეცემა, მოვისმინოთ ამა თუ იმ კანდიდატის ხედვა და პროგრამა - დავით სერგეენკო

საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრის, დავით სერგეენკოს განცხადებით, „ქართული ოცნება“ გადაწყვეტს, რომელ საპრეზიდენტო კანდიდატს დაუჭერს მხარს მხოლოდ მას შემდეგ, როცა გაეცნობა ყველა კანდიდატის წინასაარჩევნო პროგრამას.

მინისტრის თქმით, საპრეზიდენტო არჩევნებში „ქართული ოცნების“ მიერ პარტიული კანდიდატის არდასახელებას თავისი ახსნა გააჩნია.

„არსებობს ორი მოცემულობა. პირველი, რაც გუშინ ცალსახად გაცხადდა შეხვედრის შემდეგ, რომ „ქართულმა ოცნებამ“ გადაწყვიტა, არ წარმოადგინოს პარტიული კანდიდატი და ამას თავისი ახსნა და ლოგიკა აქვს. რაც შეეხება იმას, თუ ვის დაუჭერს „ქართული ოცნება“ მხარს, რომელ დამოუკიდებელ კანდიდატს, ეს გამოჩნდება უახლოეს პერიოდში, მას შემდეგ, რაც შესაძლებლობა მოგვეცემა, მოვისმინოთ ამა თუ იმ კანდიდატის ხედვა და პროგრამა. ძირითადი მსჯელობა იყო და საბოლოოდ შევთანხმდით ყველანი იმაზე, რომ პარტიული კანდიდატი არ იქნება წარმოდგენილი. ეს ერთი და მეორე - შეთანხმება იყო, რომ ჩვენ მხარდაჭერას არ ვაცხადებთ ამ ეტაპზე არცერთი კანდიდატის მიმართ, სანამ არ ვნახავთ მათ რეალურ პროგრამასა და ხედვას“, - განმარტა სერგეენკომ.