პოლიტიკა

ვინ გიცნობთ თქვენ საქართველოში და საიდან წამოვიდა თქვენი კანდიდატურა ეკონომიკის მინისტრის პოსტზე? - რომან გოცირიძე გიორგი ქობულიას

„ვინ გიცნობთ თქვენ საქართველოში და საიდან წამოვიდა თქვენი კანდიდატურა ეკონომიკის მინისტრის პოსტზე?“, -ამ კითხვით მიმართა ფრაქცია „ნაციონალური მოძრაობის“ თავმჯდომარე რომან გოცირიძე ეკონომიკისა და მდგრადი განვითარების მინისტრობის კანდიდატს, გიორგი ქობულიას აგრარულ საკითხთა, გარემოს დაცვისა და ბუნებრივი რესურსების, დარგობრივი ეკონომიკისა და ეკონომიკური პოლიტიკის, რეგიონული პოლიტიკისა და თვითმმართველობისა და საფინანსო-საბიუჯეტო კომიტეტების გაერთიანებულ სხდომაზე.

გოცირიძე დაინტერესდა, ვინ შეარჩია ქობულიას კანდიდატურა, იცნობს თუ არა პირადად ბიძინა ივანიშვილს და ჰქონდა თუ არა შეხება „ქართული ოცნების“ დამფუძნებლის ბიზნესთან. ოპოზიციონერმა დეპუტატმა დასძინა, რომ ქობულიას არავინ არ იცნობს არც ოპოზიციაში და არც საპარლამენრტო უმრავლესობაში.

გოცირიძის შეკითხვას დარბაზიდან „ქართული ოცნების“ წევრის, ირაკლი შიოლაშვილის რეპლიკა მოჰყვა.

„ვერა ქობალიას ვინ იცნობდა?“, – იკითხა შიოლაშვილმა, რაზეც გოცირიძემ უპასუხა, რომ ვერა ქობალია დღეს არის ინდონეზიის მთავრობის მრჩეველი და წარმატებით განაგრძობს საკუთარ საქმიანობას.

„მე, ახლა სწორედ ის ვთქვი და ის ვიკითხე, რასაც თქვენ ვერ ამბობთ, მაგრამ გულში ფიქრობთ“, - მიმართა გოცირიძემ „ქართული ოცნების“ დეპუტატებს.

მოგვიანებით ამ თემას მიუბრუნდა „ქართული ოცნების“ წევრი კობა ლურსმანაშვილი, რომელმაც ჰკითხა ქობულიას „იცნობდით თუ არა მიხეილ სააკაშვილს ან რომან გოცირიძეს, არ დამაკარგვინოთ თქვენზე შთაბეჭდილება“.