პოლიტიკა

ვიღებთ სიტუაციას, როცა უფრო კვალიფიციური კადრები რეალურად რჩებიან კონკურსში ლიდერი პოზიციისგან მოშორებით - სახალხო დამცველი

სახალხო დამცველმა უჩა ნანუაშვილმა სტარსბურგის მოსამართლეთა კანდიდატების შესარჩევი სხდომის შეფასებისას განაცხადა, რომ ის ხარვეზებით წარიმართა, რადგან არ იყო ჩამოყალიბებული კანდიდატების შერჩევის მკაფიო კრიტერიუმები.

ომბუდსმენის თქმით, წინა კონკურსის შეცდომა განმეორდა, როცა უფრო ძლიერი კონკურსანტები შემდეგ ეტაპზე ვერ გადავიდნენ.

„არანაირი მკაფიო და კონკრეტული კრიტერიუმები, რომლითაც კონკურსის პროცესი იქნებოდა შეფასებული, სამწუხაროდ, არ არსებობს. საბოლოო ჯამში, ვიღებთ ასეთ შედეგს, როდესაც უფრო კვალიფიციური კადრები რეალურად რჩებიან კონკურსში ლიდერი პოზიციისგან მოშორებით.

ვფიქრობ, ეს არის საკმაოდ სერიოზული პრობლემა. რაც მოხდა წინა კონკურსის დროს, ამ შემთხვევაშიც შეიძლება ითქვას, რომ განმეორდა მსგავსი რამ და გარკვეული ხარვეზები ნამდვილად არსებობს. ეს არის, სამწუხაროდ, პროცესი, რომელიც თავიდანვე მიმდინარეობდა ხარვეზებით“, - განაცხადა ნანუაშვილმა.

დღევანდელ შესარევ კონკურსში 7 კანდიდატი მონაწილეობდა. მათგან ყველაზე მაღალი ქულა ლალი ფაფიაშვილმა (4.82) მიიღო, მეორე ადგილი დაიკავა თამარ ალანიამ (4.45), მესამე ადგილზე კი თანაბარი ქულით (3.73) ოთარ სიჭინავა და იოსებ ბაჩიაშვილი გავიდნენ. ამ 4 კანდიდატიდან მთავრობამ 2 უნდა აირჩიოს, რომლებიც ლადო ჭანტურიასთან ერთად ევროსაბჭოს უნდა წარუდგინოს.

დღევანდელ კონკურსში მონაწილეობაზე უარი თქვა უზენაესის სასამართლოს მოსამართლემ ნინო ბაქაქურმა.

გარდა ამისა, სხდომას ბოიკოტი გამოუცხადა ადვოკატთა ასოციაციის თავმჯდომარემ ზაზა ხატიაშვილმა, რომელმაც მოუწოდა სახალხო დამცველს, უარი ეთქვა მონაწილეობაზე. სხდომას არ დასწრებია ახალგაზრდა იურისტთა ასოციაციის თავმდჯომარე ანა ნაცვლიშვილი. გარდა ამისა „კოალიცია დამოუკიდებლი და გამჭვირვალე მართლმსაჯულებისთვის“ შემავალი არასამთავრობო ორგანიზაციებიც გაემიჯნენ დღევანდელ სხდომას.

ანა მებურიშვილი