მსოფლიო

ვიღაცას სურს რუსეთ-ესტონეთის საზღვარზე ვითარების გამწვავება- რუსეთის საგარეო უწყების განცხადება

რუსეთის საგარეო საქმეთა სამინისტრო, ესტონეთის საგარეო უწყების გადაწყვეტილებას, რუსი დიპლომატების გაძევების შესახებ, "პროვოკაციულსა" და "დაუსაბუთებელს" უწოდებს და აცხადებს, რომ აღნიშნულ ქმედებას საპასუხო ზომები მოჰყვება.

ამის შესახებ რუსეთის საგარეო უწყების განცხადებაშია ნათქვამი,რომელიც უწყების ვებ-გვერდზე განთავსდა.

„ესტონეთის ხელისუფლების მიერ გადადგმული ღიად მტრული აქცია, რასაკვირველია,ორმხრივ ურთიერთობას კიდევ უფრო გაართულებს. როგორც ჩანს, ვიღაცას მოუნდა კიდევ უფრო გაემწვავებინა ვითარება ესტონეთ-რუსეთის საზღვარზე, წაახალისოს მითები რუსეთის აგრესიის შესახებ,ასევე გაამართლოს ესტონეთის ხელისუფლების რუსოფობიური პოლიტიკა, ასევე კონფრონტაციული პოლიტიკა ჩვენი ქვეყნის „შეკავების“ შესახებ.

მომხდარი ადასტურებს, ესტონეთის მთავრობის დესტრუქციულ პოლიტიკას, რომელიც ეწინააღმდეგება ორი მეზობელი სახელმწიფოს ხანგრძლივ ურთიერთობას. მომხდარზე პასუხისმგებლობა ესტონეთის ხელისუფლებას ეკისრება“,-ნათქვამია საგანგებო განცხადებაში.

გუშინ, ესტონეთიდან რუსეთის გენერალური კონსული და კონსული გააძევეს.

მონიკა დავლიანიძე