პოლიტიკა

ვფიქრობთ კალაძე იქნება თბილისის მერობის კანდიდატი - გია ვოსლკი

„ქართული ოცნების“ წევრის, გია ვოლსკის განცხადებით, თბილისის მერის არჩევნებზე სახელისუფლებო გუნდის კანდიდატი, დიდი ალბათობით, ენერგეტიკის მინისტრი კახა კალაძე იქნება.

ამის შესახებ დეპუტატმა საპარლამენტო უმრავლესობის დახურული შეხვედრის შემდეგ თქვა.

„ჩვენ ვფიქრობთ, რომ კალაძე იქნება კანდიდატი. ამის შესახებ კონსულტაციები საკმაოდ პოზიტიურ ფორმატში მიმდინარეობს. რასაც ვფიქრობთ გუნდში, ის გავუზიარეთ ერთმანეთს, სხვა ალტერნატიული წინადადებები არც განგვიხილავს, მაგრამ საბოლოო გადაწყვეტილება პოლიტსაბჭოზე იქნება ჩამოყალიბებული“, - განუცხადა ვოლსკიმ ჟურნალისტებს.

შეგახსენებთ, გუშინ „შატო მუხრანში“ „ქართული ოცნების“ პარტიული შეხვედრა გაიმართა. თბილისის მერობის კანდიდატის გარდა იმსჯელეს საკონსტიტუციო ცვლილებებსა და თვითმმართველობის რეფორმებზე, ასევე მაჟორიტარული სისტემის გაუქმებასა და ადგილობრივი თვითმმართველობის არჩევნების წინასაარჩევნო პროგრამაზე.

ანა მებურიშვილი