პოლიტიკა

ვეტო დაძლეული უნდა იყოს - გია ვოლსკი

საპარლამენტო უმრავლესობის წევრის, გია ვოლსკის განცხადებით, პრეზიდენტის ვეტო პარლამენტის მიერ სამი მოსმენით მიღებულ კონსტიტუციაზე უნდა იყოს დაძლეული.

მისი განმარტებით, პრეზიდენტის შენიშვნები პოლიტიკურად მოტივირებულია.

„რასაკვირველია, ვეტო დაძლეული უნდა იყოს. ვიფიქრებდი, რომ მართლა გულწრფელი დამოკიდებულებაა და მისი პირადი შეხედულებების გარდა არის კონსულტაციების საგანი ეს თემა, მაგრამ აბსოლუტურად პოლიტიკურად მოტივირებული შენიშვნებია და თანაც გვატყუებენ. ეს 6 შენიშვნა არის, 5 თქვენც მოგწონთ და ბარემ მეექვსესაც დაუჭირეთ მხარიო. ამ დროს, პირიქით, ყველა საკითხი გავითვალისწინეთ, იმაზეც მზად ვართ, რომ ახალი ინიციატივით შემოვიდეთ და ვფიქრობთ, რომ ეს ქვეყანაზე ზრუნვით არის განპირობებული. თუკი სერიოზული შენიშვნები გაუჩნდება ვინმეს ისეთი, რომ ადრე ვერ შევამჩნიეთ და ეს გამოიწვევს პოზიტიურ ცვლილებას, მზად უნდა იყოს ნებისმიერი პოლიტიკური გუნდი, რომ აიღოს პასუხისმგებლობა და ინიციატივა შემოიტანოს“,- განაცხადა ვოლსკიმ.

დეპუტატის განცხადებით, ვენეციის კომისიამ მხარი დაუჭირა პრეზიდენტის არაპირდაპირი წესით არჩევას.

„რაც შეეხება პრეზიდენტის არჩევის წესს, გვეუბნება ვენეციის კომისია, რომ არ შეიძლება ამ უფლებმოსილებებით პირდაპირი არჩევა, რადგან ზედმეტ რესურსს აძლევს მას, რომ ქვეყანაში შესაძლო დესტაბილიზაცია შემოიტანოს. რაც შეეხება განცხადებას იმის შესახებ, რომ პარლამენტი არ უნდა ირჩევდეს პრეზიდენტს, ხალხს არ ვართმევთ პრეზიდენტის პირდაპირ არჩევის უფლებას. ხალხი ირჩევს თავის წარმომადგენლებს, რომელიც აირჩევს პრეზიდენტს, სხვა წარმომადგენლებთან ერთად“, - განმარტა პარლამენტარმა.

პარლამენტმა საკონსტიტუციო ცვლილებათა კანონპროექტი 26 სექტემბერს დაამტკიცა. 9 ოქტომბერს მმართველ გუნდთან და ოპოზიციასთან მოლაპარაკებების შემდეგ საქართველოს პრეზიდენტმა გიორგი მარგველაშვილმა ახალ კონსტიტუციას ვეტო დაადო.

ანა მებურიშვილი