პოლიტიკა

ვერ ვხედავ პრობლემას, რომ არჩევნები სამუშაო დღეს გაიმართოს - კახა კალაძე

დედაქალაქის მერი კახა კალაძე ვერ ხედავს პრობლემას, თუკი საპრეზიდენტო არჩევნების მეორე ტური სამუშაო დღეს ჩატარდება. ამის შესახებ მან ჟურნალისტებს უთხრა.

მისივე მტკიცებით, ვისაც სურვილი აქვს, რომ არჩევნებში მიიღოს მონაწილეობა, „ეს არ გაუჭირდებათ, როგორც არ გაუჭირდათ 2012 წელს“.

„ცესკო-მ მიიღო გადაწყვეტილება, რომელსაც კანონი ავალდებულებს. როდესაც შემაჯამებელი ოქმი და ყველა გასაჩივრება სრულდება, როგორც ვიცი, ხდება გადათვლა და ინიშნება არჩევნების დღე. ნამდვილად ვერ ვხედავ პრობლემას, რომ არჩევნები სამუშაო დღეს გაიმართოს, ამის მაგალითებიც და პრეცედენტებიც არსებობს. თუ არ ვცდები, 2012 წელს, ზუსტად არ მახსოვს, არჩევნები იყო ორშაბათ დღეს, ასე რომ, ეს ნამდვილად არ წარმოადგენს პრობლემას. ვისაც სურვილი აქვს, რომ მიიღოს არჩევნებში მონაწილეობა, მათ ეს არ გაუჭირდებათ, როგორც არ გაუჭირდათ 2012 წელს“, – განაცხადა კალაძემ.

კანონმდებლობით, არჩევნების მეორე ტური შემაჯამებელი ოქმის გამოქვეყნებიდან ორი კვირის თავზე ინიშნება, აქედან გამომდინარე, წესისამებრ ის 28 ნოემბერს გაიმართება.

უშუალოდ არჩევნების თარიღს ცესკო ოფიციალურად დღეს 19:00-ზე გამოაცხადებს.