პოლიტიკა

ვენეციის კომისია საკონსტიტუციო პროექტზე საკუთარ მოსაზრებას 6 ოქტომბერს გამოაქვეყნებს - ვენეციის კომისიის მდივანი

ვენეციის კომისიის მდივანი ტომას მარკერტი მმართველი გუნდის გადაწყვეტილებას გამოეხმაურა, რომლის თანახმად საპარლამენტო უმრავლესობა არ მიიღებს მონაწილეობას ოპოზიციასთან სტრასბურგში დაგეგმილ მოლაპარაკებებში.

როგორც მარკერტმა „რუსთავი 2“-ს განუცხადა, მცირე კონსესუსის პირობებში მსგავსი შეხვედრები აზრს კარგავს.

რაც შეეხება მმართველი გუნდის გადაწყვეტილებას, რომ ის საკონსტიტუციო ცვლილებებს საშემოდგომო სესიაზე, მესამე მოსმენით მიიღებს, მარკერტმა თქვა, რომ ვენეციის კომისია საკონსტიტუციო პროექტის დასკვნას 6 ოქტომბერს გამოაქვეყნებს.

„ვენეციის კომისია ამ მოლაპარაკების ნაწილი არ იყო. რაც საქართველოდან შევიტყვე, არის ის, რომ კონსენსუსი მიღწეული არ არის. მმართველი პარტიის დღევანდელი განცხადებაც ამას ადასტურებს. ჩვენთვის დასანანია, რომ ასეა. მხოლოდ ერთი კი არა, ყველა მხარე უნდა ყოფილიყო მოქნილი. ჩვენ ველით, რომ მოგვმართავენ თხოვნით, შევაფასოთ მიღებული ტექსტი. ვენეციის კომისია საკუთარ მოსაზრებას 6 ოქტომბერს გამოაქვეყნებს. შესაძლოა ამას მოჰყვეს გარკვეული შეზღუდული ცვლილებები, რომ ტექსტი გახდეს უფრო მოქნილი ოპოზიციისთვის. რამდენადაც ჩემთვის ცნობილია, მმართველი პარტია არ გამორიცხავს გარკვეული ცვლილებების შეტანას. ამისთვის ადგილი ყოველთვის უნდა არსებობდეს. რაც შეეხება მომავალ კვირას დაგეგმილ შეხვედრას, მას ასეთი მცირე კონსენსუსის პირობებში აზრი არ ექნება,” - განაცხადა მარკერტმა.

აღნიშნულ წერილში საპარლამენტო უმრავლესობამ შეხვედრის ჩაშლაში ოპოზიცია დაადანაშაულა. მმართველი გუნდის აზრით, ოპოზიციამ დიალოგი ჩიხში შეიყვანა.

შეგახსენეებთ, ვენეციის კომისიის თავმჯდომარემ ჯანი ბუკიკიომ ქართულ ოპოზიციურ პარტიებსა და მმართველ გუნდს 6 სექტემბერს, სტრასბურგში დაპატიჟა საკონსტიტუციო ცვლილებებზე სამსჯელოდ.

ანა მებურიშვილი