პოლიტიკა

ვენეციის კომისია საკონსტიტუციო პროექტზე საბოლოო დასკვნას ოქტომბერში გამოაქვეყნებს - ირაკლი კობახიძე

ვენეციის კომისია საკონსტიტუციო პროექტზე საბოლოო დასკვნას ოქტომბერში გამოაქვეყნებს, - ამის შესახებ ჟურნალისტებს პარლამენტის თავმჯდომარე ირაკლი კობახიძემ განუცხადა.

მისი თქმით, საქართველოს პარლამენტმა სთხოვა ვენეციის კომისიას, რომ დასკვნა გამოქვეყნდეს საკონსტიტუციო პროექტის ორი მოსმენით მიღების შემდეგ ოქტომბერში, რათა ამ დასკვნაში აისახოს ის ცვლილებები, რომლებიც ბოლოს განხორციელდა.

კობახიძის თქმით, შესაბამისად, მესამე მოსმენით პარლამენტი კონსტიტუციაში შესატან ცვლილებებს ოქტომბერში მიიღებს.

როგორც პარლამენტის თავჯდომარემ აღნიშნა, ვენეციის კომისიამ მყარად დაადასტურა, რომ საქართველოს კონსტიტუციის ახალი რედაქცია სრულ შესაბამისობაშია კონსტიტუციური სამართლის პრინციპებთან.

მისი თქმით, საქართველოს საპარლამენტო დელეგაციამ მონაწილეობა მიიღო ვენეციის კომისიის პლენარულ სხდომაში, სადაც სხვა საკითხებთან ერთად განიხილებოდა საქართველოს საკონსტიტუციო ცვლილებებიც.

”მოხარული ვართ, რომ ვენეციის კომისიამ მყარად დაადასტურა, რომ ჩვენი კონსტიტუციის ახალი რედაქცია სრულ შესაბამისობაშია კონსტიტუციური სამართლის პრინციპებთან.

პლენარულ სხდომაზე ჩვენ კიდევ ერთხელ გამოვთქვით ჩვენი სრული მზადყოფნა, რომ გავითვალისწინებთ ვენეციის კომისიის ყველა რეკომენდაციას. ამ რეკომენდაციების გათვალისწინების საფუძველზე გაგრძელდება განხილვები ჩვენი კონსტიტიციის პარლამენტში.

გარდა ამისა, ჩვენ ვენეციის კომისიას ვთხოვეთ, რომ ოქტომბრის თვეში წარმოადგინოს უკვე საბოლოო დასკვნა საკონსტიტუციო რეფორმასთან დაკავშირებით, მას შემდეგ, რაც ეს დოკუმენტი ორი მოსმენით იქნება მიღებული პარლამენტის მიერ. ამ საბოლოო დასკვნაში, ოქტომბერში უკვე სრულად იქნება
ასახული ყველა ის ნორმა, რომელიც წარმოდგენილი არის საქართველოს კონსტიტუციაში”,- აღნიშნა კობახიძემ.

ნინო ექვთიმიშვილი