პოლიტიკა

ველი დროს, როდესაც გამარჯვებული ძალა დაიწყებს მოკავშირეების და არა მტრების ძებნას - გიორგი მარგველაშვილი

პრეზიდენტი გიორგი მარგველაშვილი მმართველ გუნდს დიალოგისკენ და ინსტიტუციური თანამშრომლობისკენ მოუწოდებს.

"საკონსტიტუციო უმრავლესობა აჩენდა ძალაუფლების კონცენტრაციის საფრთხეს, ამავდროულად - თამამი რეფორმების და ინიციატივების შესაძლებლობებსაც. სავარაუდო საფრთხე იქცა სერიოზულ პრობლემად, რეფორმების დინამიკა კი, არ არის შთამბეჭდავი. სამწუხაროდ, მმართველმა ძალამ პრაქტიკულად უარი თქვა დიალოგზე და ჩაიკეტა საკუთარ თავში. ამ ფონზე მისასალმებელია დღევანდელი დებატები. ველი დროს, როდესაც გამარჯვებული ძალა დაიწყებს მოკავშირეების და არა მტრების ძებნას", - განაცხადა გიორგი მარგველაშვილმა პარლამენტში სიტყვით გამოსვლისას.

პრეზიდენტი პარლამენტში ყოველწლიური ანგარიშით გამოვიდა, რომელსაც პრემიერ-მინისტრი გიორგი კვირიკაშვილი და საქართველოს მთავრობის წევრები დაესწრნენ. პარლამენტში იმყოფებიან საქართველოში აკრედიტირებული დიპლომატიური კორპუსის წარმომადგენლებიც.

ამჟამად პარლამენტში შესვენებაა გამოცხადებული, რომლის დასრულების შემდეგაც დებატები გაიმართება.

უფრაქციო დეპუტატებს დაეთმობა 5-5 წუთი, უმრავლესობის და უმცირესობის გარეთ არსებული ფრაქციების ("ნაციონალური მოძრაობა", "საქართველოს პატრიოტები") დეპუტატებს - 15-15 წუთი, უმრავლესობის და უმცირესობის ფრაქციების დეპუტატებს - 10-10 წუთი, უმრავლესობის და უმცირესობის დეპუტატებს - 45-45 წუთი, ვიცე სპიკერებს - 10-10 წუთი, პარლამენტის თავმჯდომარეს - 15 წუთი.

ნინო ექვთიმიშვილი