სამართალი

ვეძისში დაჭრილები საავადმყოფოში რჩებიან

თბილისში, ვეძისის დასახლებაში გუშინ საღამოს დაჭრილი ოთხი ახალგაზრდა კვლავ რესპუბლიკურ საავადმყოფოში რჩება.

ექიმის, ზვიად ძნელაძის განცხადებით, გოგონა მსუბუქად იყო დაჭრილი და ის მალევე გაწერეს, ოთხ ახალგაზრდა მამაკაცს კი ქირურგიული დახმარება დასჭირდა. მათ ცეცხლსასროლი იარაღით მიყენებული ჭრილობები აღენიშნებოდათ.

მისივე თქმით, ერთ-ერთი პაციენტის მდგომარეობა, რომელსაც ფილტვი ჰქონდა დაზიანებული, შედარებით მძიმე იყო. სამედიცინო დახმარების შემდეგ, ორი პაციენტი რეანიმაციულ განყოფილებაში რჩება, ორი კი პალატაშია გადაყვანილი.

შსს-ს ინფორმაციით, დაახლოებით, 19:00 საათზე, ურთიერთშელაპარაკების ნიადაგზე 1998 წელს დაბადებული ზ.ღ., 1996 წელს დაბადებული ლ.ს., 1993 წელს დაბადებული გ.ს. და 1996 წელს დაბადებული გ.ხ. დაჭრეს. მომხდარზე გამოძიება მიმდინარეობს საქართველოს სსკ-ის 19-109-ე მუხლით, რაც დამამძიმებელ გარემოებაში განზრახ მკვლელობის მცდელობას გულისხმობს და 236-ე მუხლით, რაც ცეცხლსასროლი იარაღის და საბრძოლო მასალის მართლსაწინააღმდეგო შეძენა-შენახვა-ტარებას გულისხმობს.