პოლიტიკა

ვაშინგტონშიც კი მიიჩნევენ, რომ მოსკოვთან დიალოგი აუცილებელია - დავით თარხან-მოურავი

„პატრიოტთა ალიანსის“ ლიდერი დავით თარხან-მოურავი არ გამორიცხავს, რომ ოკუპირებულ ცხინვალსა და სოხუმში ჩავიდეს.

თარხან-მოურავმა დღეს გამართულ პრესკონფერენციაზე ცხინვალთან და ოსეთთან პირდაპირი დიალოგის დაწყების აუცილებლობაზე ისაუბრა და აღნიშნა, რომ სოხუმსა და ცხინვალში ვიზიტის პერსპექტივა არსებობს.

„ცხინვალში ჩასვლის გეგმა არსებობს. ეს არ არის საკითხი, რომელიც შეიძლება დღეს გადაიჭრას. ბევრი რამის თქმა არ შემიძლია, მაგრამ ამის პერსპექტივა არსებობს, თუმცა დიალოგისთვის საქართველოს ხელისუფლება არაფერს არ აკეთებს. ხელისუფლებამ სოხუმთან და ცხინვალთან ლაპარაკი უნდა დაიწყოს. ვაშინგტონშიც კი მიიჩნევენ, რომ მოსკოვთან დიალოგი აუცილებელია, რათა უზარმაზარი მტრობა და დაპირისპირება ჩაქრეს, რაც არის.

ძალა არ გვაქვს, რომ რუსეთს მოვერიოთ, რადგან ათასჯერ მეტი ტერიტორია აქვს. დიალოგი აგრესიას აქრობს და გამოსავალია საქართველო-ნატო-რუსეთის ფორმატი. საქართველოში კონფერენცია უნდა ჩატარდეს, რუსი და ამერიკელი კონგრესმენები ჩამოვიყვანოთ, სადაც განხილვის საგანი - თავდაუსხმელობა, საზღვრების საკითხი იქნება.

რუსეთი თანახმაა, ასეთ ფორმატზე ვილაპარაკოთ. როგორც მინიმუმ, ეს ფორმატი იმას მაინც მოგვიტანს, რომ რაღაც კოლექტიურ გარანტიაზე შევთანხმდეთ. რუსეთში შეხვედრაზე თითოეული სიტყვა რაც ითქვა, ამის სტენოგრამა არსებობს. კარგი პასუხებია, მაგრამ თქვენთვის კონფიდენციალურია. ამას საერთაშორისო ორგანიზაციები მიიღებენ და ხელისუფლებამ ყველაფერი იცის", - განაცხადა თარხან-მოურავმა.

,,პატრიოტთა ალიანსის“ ლიდერმა საქართველოს მთავრობის პოლიტიკაზეც ისაუბრა და აღნიშნა, რომ გიორგი კვირიკაშვილი თანამდებობიდან უნდა გადადგეს.

„კვირიკაშვილი და ბოკერია ერთი გუნდია, ერთმანეთთან გარიგებული არიან და რაზე უნდა ვილაპარაკოთ, კვირიკაშვილის მთავრობა უნდა გადადგეს. ამ მთავრობას ჩვენ გადავაყენებთ", - განაცხადა ,,პატრიოტთა ალიანსის“ ლიდერმა.

თარხან-მოურავმა აქვე აღნიშნა, რომ მის გუნდს ბიძინა ივანიშვილი არ აფინანსებს.

„ბიძინა ივანიშვილი არ გვაფინანსებს და მით უმეტეს, რუსული სპეცსამსახურები. რუსეთისგან ვინც ფინანსდება, არ მალავს. ეს შურია ჩვეულებრივი, რადგან პოლიტიკურ ველზე არიან პარტიები, რომელებიც ქრებიან. ნათელაშვილის პარტია არსებობს, ორი კაცია სულ პარტიაში? ვინ აფინანსებს შალვას? მოუსმინეთ და გაიგებთ. გზას ვკვალავთ და ხელისუფლებას ვეუბნებით, წადით მოლაპარაკებებზე-თქო. კვირიკაშვილი იმას აკეთებს, რასაც ბოკერია ეუბნება. რა გვსურს ჩვენ? - დაბრუნება თუ გვინდა, ნებისმიერ მოქნილ ნაბიჯზე უნდა წავიდეთ, რომ აფხაზეთი და ოსეთი დავიბრუნოთ. რუსეთი ამერიკასთან და ბრიუსელთან ერთად უნდა ვაიძულოთ, რომ ამ რეგიონში იყოს მშვიდობა.

„ქართულ ოცნებაში" არის ხალხი, ვინც ჩვენს იდეებს მხარს უჭერს და არიან ადამიანები, ვინც წინააღმდეგია", - აღნიშნა თარხან-მოურავმა.